湯怡「公主式」過大禮 齋睇唔准郁

東方日報
·2 分鐘文章
獲贈大批金器的湯怡,四萬咁口與「聘禮山」合照。
獲贈大批金器的湯怡,四萬咁口與「聘禮山」合照。

英皇藝人湯怡上月底夾埋排舞師未婚夫麥秋成玩「突襲」,宣布雙喜臨門,本月將舉行簡單婚禮。昨日是過大禮的大日子,準新娘獲老闆楊受成當「嫁女」般豪送「流星錘」及金器,又被「勒令」齋坐唔准郁,猶如公主級侍候!

一對準新人昨日舉行過大禮儀式,麥秋成難掩興奮之情,一早在社交網上載湯怡婚紗一角的照片,冧爆用英語寫上「跟我的未婚妻」,然後依足傳統,準備大堆聘禮到女方家,龍鳳鈪、金豬牌、首飾、大筒花膠、瑤柱花菇、中式禮餅、巨型生果籃、紅酒、椰子等大晒冷,誠意十足!禮成後,身穿喜慶紅衣的湯怡與「聘禮山」興奮合照,繼用水仙花後再成功遮肚,而經理人霍汶希得悉老闆楊受成大手筆送「嫁女」金器,不禁呷醋說:「我都想嫁!」

湯怡笑言全程齋坐用眼望︰「冇人夠膽畀嘢我做,就算我想幫手,佢哋都話『你唔好呀』,不過都好嘅,呢段時間大家當我公主咁,加上秋明(麥秋成弟弟)係Wedding Planner,所以好多嘢都係佢幫我哋Manage。」問及身體狀況,她興奮表示感覺很奇妙,暫時未算太緊張︰「反而會同朋友或家姐傾吓生完BB之後會點,好多知識依家吸收緊,睇好多媽媽書,譬如坐月嘅時候應該食啲乜?懷孕期身體會有咩變化?同埋會補充好多Supplement,希望有足夠營養畀BB。」

麥秋成惡補做老竇

至於準新郎麥秋成近日邊工作邊籌備婚禮,幸好有弟弟幫忙,減少很多煩惱,他說︰「有好多細節要準備,擇日、揀聘禮、婚禮場地、布置,加上禁聚令要諗賓客嘅安排,忙到抖唔到氣,但最緊要家怡(湯怡原名)同屋企人開心滿意,當一切安排好,我哋就會公布婚禮日子,同各位分享我哋嘅快樂。」他又表示每天都跟湯怡準備迎接BB來臨,希望做一對稱職的父母。

湯怡用水仙花遮掩孕肚,賣吓關子先!
湯怡用水仙花遮掩孕肚,賣吓關子先!