湯鎮業愛女湯愛嘉結婚嘉賓星光熠熠 劉德華變Uncle Andy拍片賀新人

前日相信係結婚好日子，除咗亞視前花旦麥翠嫺同老公龔汝華嘅大女龔敏晴Victoria星期日（20日）出嫁之外，TVB 80年代「五虎將」之一嘅湯鎮業亦喺當日榮升做外父，愛女湯愛嘉同男友Alex拉埋天窗，仲舉行咗一場星光熠熠嘅華麗婚宴。

湯愛嘉同Alex喺尖沙咀海傍Rosewood舉行婚禮，湯鎮業嘅多位星級好友都有出席，包括向華強伉儷、劉嘉玲、苗僑偉、湯愛嘉堂姐湯洛雯等。同屬「五虎將」嘅梁朝偉同劉德華未有到場，但華仔就拍片送上祝福，仲以「Uncle Andy」身份親切地叫湯愛嘉「嘉嘉」，相當溫馨。有網紅拍片紀錄現場情況，酒店場地有唔少鮮花佈置，高貴優雅，而婚宴就筵開50席，並且有DJ打碟。

80年代成為當紅小生嘅湯鎮業，因為當時女友翁美玲輕生而令佢事業走下坡，90年代湯轉為營商，喺內地打出一片天。湯鎮業同前亞視藝人姜坤於1993年結婚，二人育有湯愛嘉同埋孖仔湯君慈、湯君耀兩兄弟，但湯鎮業同前亞視藝人姜坤於2001年離婚收場。後來湯鎮業再婚迎娶內地女子鄒文靜，二人育有一對孖女，連同湯鎮業與另一紅顏知己所生嘅兒子，湯鎮業一共有6個仔女。前妻姜坤曾盛讚離婚後對佢同仔女相當照顧，十分負責。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！