保錡＠ERROR被指背住菊梓喬撩「體育女神」黃捷穎 個人社交平台封殺hater︰想block 就block

一直有唔少新聞嘅男團ERROR成員吳保錡，早前盛傳撻著前「星夢一姐」菊梓喬，不過今日有周刊就報導指，近年熱愛跑步嘅保錡，背住Hana藉練跑同人稱「體育女神」嘅Vinky黃捷穎熟絡起嚟。

報導指早前保錡返到主場大埔運動場練跑，Vinky都係跑友之一。保錡身為跑會風頭躉，不時被跑友要求合照，但係仲會同Vinky嗲幾句並且影selfie。到練完跑，保錡據講同另一男跑友一齊搵Vinky去食飯，換完衫就急急腳走人。

成為保錡另一位緋聞女主角嘅黃捷穎Vinky今年38歲，原來係前中國國家二級跨欄運動員。結過婚嘅Vinky退役後轉型做KOL、插畫師同MC，不時喺社交平台分享水著照。Vinky近期有意向幕前發展，於是參加TVB《中年好聲音3》同埋ViuTV嘅《美麗40路》，《中3》更打入100強。Vinky同時跟跑會練跑而認識保錡，有指保錡更介紹圈中人俾Vinky識。

但係保錡同一時間同Hana菊梓喬過從甚密，甚至被指同居，男方更幫手托廁紙上女方香閨。而雙方都係對戀情表示「了解中」，不過就隔空互讚，保錡甚至被爆紋咗個綠色心心，一於同Hana襯到絕。

不時被網民負評嘅保錡懶理hater，尋日仲出post表明「想block 就block 就係咁簡單 我只求快樂」，保持正能量，完全唔打算同網民糾纏。保錡甚至將早前被網民攻擊係「跑步小丑」嘅留言轉化成創作概念，推出新歌《跑吧，小丑》，識玩。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！