【滑出火花？】傳容祖兒與楊受成細仔楊政龍暗撻四個月

由2013年開始同劉浩龍（師兄）拍拖嘅容祖兒（Joey），二人戀情一直不被外間睇好，最終二人感情於2018年正式完結，雙方回復單身。回復單身嘅Joey，一直有唔好友陪伴在側，好似有阿SA、阿嬌、關智斌（Kenny）、張敬軒及鄭希怡（Yumiko）陪佢Shopping同周圍旅行之外，原來佢哋仲有多一樣活動，就係一齊出海滑水！除咗呢班英皇朋友之外，仲有一個人陪Joey療情傷，就係英皇娛樂集團老闆楊受成嘅細仔楊政龍（Alex）。喺今年2月，Joey同關智斌Kenny加埋楊政龍(Alex)相約去北海道，一齊睇雪景及滑雪。

Alex係老闆個仔，而Joey又係英皇旗下藝人，要見面真係話都冇咁易！更何況經常相約滑水，久而久之滑出愛火花，有傳佢地秘密一齊咗4個月。其實Alex上年11月於個人社交平台貼上一張同Joey親暱合照，不過當記者訪問過Joey時，Joey就直言同Alex冇可能，因為自己睇住佢長大，大家已經係一家人。

話雖如此，不過唔知大家仲記唔記得早前Joey曾經為無綫拍嘅《容祖兒Love in LA》節目呢？佢提過自己唔會咁輕易大顯身手，只會拍拖先會煮野食俾自己另一半！而Joey就係咁啱有傳媒影到佢揀牛扒，唔知係咪打算煮嘢食俾Alex呢？另外，今年4月G.E.M.於高雄開世界演出嘅巡遊演唱會，Alex都有陪Joey去台灣睇騷！

可能Alex同Joey都係英皇人嘅關係，平時出入其他人都可能覺得佢哋似「兄弟」，並唔係一對熱戀嘅情侶！不過亦有消息指今次Joey同Alex拍拖，都幾討人歡心，至少冇咗一種「女尊男卑」嘅感覺。如果佢哋嘅戀情係真嘅話，真係恭喜晒佢哋啦！