演唱會今晚揭開序幕 回顧鄭秀文樂壇成長之路

鄭秀文（Sammi）嘅第10個個人紅館演唱會《FollowMI 鄭秀文世界巡迴演唱會》喺今晚（12號）正式展開序幕，而演唱會主題曲《我們都是這樣長大的》亦喺日前發布。無論你買唔買到飛都好，不如趁今日一齊回顧佢嘅樂壇成長之路，為佢嘅演唱會之前做足準備啦！

1988年初試啼聲嘅鄭秀文參加咗無綫第七屆《新秀歌唱大賽》，當時嘅參賽作品係葉蒨文嘅《乾一杯》，獲得季軍繼而加入「華星唱片」，但同時間兼顧學業。1990年完成學業之後，推出第一隻個人大碟《Sammi》銷量超過二萬五千張。

1992年嘅《火熱動感LaLaLa》唱到街知巷聞，更推出群星大碟《火熱動感》。原先以玉女形象示人嘅鄭秀文，藉著《火熱動感LaLaLa》一曲大受歡迎之後，改變路線開始以快歌為主。1993年憑第一首跳唱主打歌曲《Chotto等等》令大碟《鄭秀文的快樂迷宮》賣出超過10萬張唱片。唱片公司就順勢再推出多首快歌《大報復》、《叮噹》、《熱脹冷縮》。同年，與許志安合唱嘅經典歌曲《其實你心裏有沒有我》橫掃各大音樂頒獎典禮。

形象逐漸改變嘅鄭秀文，更加開始以破禁丶大膽前衛風格推出大碟《十誡》，而其中一首Remix版本《十誡(禁忌的遊戲)》因為較為大膽，以致電台及電視台禁播。

1995年轉投華纳唱片推出首張大碟《捨不得你》，一星期銷售量已經超過五萬張。1996年氣勢如虹嘅鄭秀文，開始進攻台灣市場，第一張國語專輯《值得》銷售量超過70萬張。而鄭秀文首次個人大型演唱會《TCBY Sammi X Live 96鄭秀文X空間演唱會》共開8場，場場爆滿。而當中嘅百變形象更成為潮流熱話。更首次奪得「十大勁歌頒獎典禮」最受歡迎女歌手，自此天后地位得以確立。

1998年因為合約問題氣勢稍減，但1999年推出國語大碟《我應該得到》，台灣銷量超過55萬張，亞洲總銷量更超過190萬張。之後再推出大碟《很愛很愛》亞洲總銷量45萬張。及至年底舉行第三次個人演唱會《Chase Sammi I concert 99》。年底再度推出大碟《愛情故事》，總銷量超過120萬張。

2000年推出快歌《煞科》及《獨家試唱》，當時呢兩首快歌佔據各大K場及D場，Sammi更被冠以「Dancing Queen 」及「90年代中後期以來香港女歌手中的舞曲第一人」等等。

2001年憑藉電影《瘦身男女》主題曲《終身美麗〉第三次再度奪得「最受歡迎女歌手」，亦係最後一年參與香港樂壇四大音樂頒獎典禮。

2004年轉投「東亞唱片」。之後幾年因為專注拍攝電影工作，而且身體情況不太好，加上唱片業開始進入低潮期，音樂事業幾乎停頓。

2007年復出樂壇嘅Sammi，舉行咗一連四場演唱會《景福Show Mi鄭秀文2007演唱會》門票供不應求，之後加多四場。而憑着《景福Show Mi鄭秀文2007演唱會》所推出的影音產品，獲得 IFPI 頒獎禮2007年最高銷量廣東唱片、全年最高銷量本地女歌手兩個獎項。亦係首位歌手憑一張唱片獲得此兩項殊榮。而呢個演唱會亦都係全球首次紅館演唱會推出藍光(BLU-RAY)大碟。

2009年受到信仰改變嘅Sammi，推出福音大碟《信Faith》，歌曲有《信者得愛》及《罪與罰》等。首日推出已經取得5萬張銷量，三個月更取得10萬張銷量。同年再度舉行演唱會《Love Mi 鄭秀文世界巡迴演唱會》，10場演唱會開售數小時已經售罄。2010年於台灣推出福音大碟《信者得愛》，頭五日銷售量已經有兩萬張。

2013年再度推出廣東大碟《Love is love》，成為iTunes熱門專輯第一位。《Touch MI 鄭秀文世界巡迴演唱會－香港站》，信用卡優先訂票迅速售罄，更令到電話系統癱瘓。另外，$680嘅門票被炒至$4000一張。喺2016年再度舉行演唱會《Touch MI 2 鄭秀文世界巡迴演唱會2016》，黃牛黨更加變本加厲，$780門票被炒至$9600。

2018年推出新曲+精選《Believe In MI》，其中一首新曲《Creo en Mi》仲搵咗韓國男團Got7嘅香港成員Jackson（王嘉爾）合唱，推出後歌迷反應熱烈。

今年三月宣布舉行第10次個人演唱會《Follow MI 鄭秀文世界巡迴演唱會》，優先訂票一小時內售罄。之後加開兩場，但最後兩場嘅歌酬將會全數捐比慈善機構。門票更由$980被炒至$98,000。

買咗飛嘅朋友，你哋準備好未？