潛行丨劉德華邀老朋友客串演出 與《神雕俠侶》雕兄曾路邊食飯

罪犯動作電影《潛行》雲集劉德華、林家棟、彭于晏、林雪、劉雅瑟、姜皓文、劉俊謙、朱鑑然等演員，上演一場警方、臥底及毒犯之間嘅三方角力戰，華仔更加兼任電影監製。電影早於上月底內地上映，亦將於1月11日香港上映，劉德華於訪問提到，《潛行》並非一般動作犯罪片，故事核心描述人與人之間關係和愛，涉及友誼及濃厚嘅愛情。電影囊括唔少動作場口，劉德華就搵嚟一班老朋友客串做動作演員，包括40年前合作劇集《神雕俠侶》嘅「雕兄」。

劉德華邀請到1983年與佢合作拍攝《神雕俠侶》飾演「雕兄」嘅動作演員孖大、1994年電影《刀劍笑》阿財（財哥）以及拍廣告認識嘅張華參演；三位前輩拍攝當日劉德華雖無戲份，但仍現身現場，又與老朋友講起舊時。孖大憶起以前與劉德華拍劇時喺路邊食飯嘅日子：「佢（劉德華）未紅嗰時，我哋開工一齊喺路邊食飯。我最記得喺電視台拍《神鵰俠侶》，嗰陣我做隻鵰，日頭拍外景，一齊吊威也打餐飽，夜晚一齊入廠做文戲，我好記得。」阿財就笑指自己唔知點解成日畀劉德華打，表示《刀劍笑》係最困難最辛苦嘅一部戲，又指劉德華好好記性，打一套動作會記得九成；而張華就分享當年與劉德華拍廣告吊威吔嘅事，表示當時因為老闆喺度唔可以亂講嘢而好尷尬。三人與劉德華亦齊齊大讚對方，佢哋讚劉德華Keep得好，劉德華又激讚三位年紀雖比佢大，但仍活力十足。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！