澳門人氣健康雪糕店8/6開幕 4款熱賣口味登陸旺角

今個夏天開始，留喺香港都食到澳門一間人氣雪糕店嘅出品喇！雪糕除咗健康無添加，不含增味劑或雪糕穩定劑等化學物質，仲不時推出創意口味，而率先引入香港嘅就有呢4款喇～

話題口味：芫荽、維他檸檬茶

芫荽味有人愛，亦有人say no，而身為一向遠離芫荽嘅開飯仔，試食後第一感覺係出奇地fresh！然後就試到淡淡嘅芫荽味，但唔會覺得係「草青」味。而維他檸檬茶味，品牌自2019年同維他公司合作推出後都一直受歡迎，皆因真係好貼近原味檸檬茶，酸酸甜甜，檸檬香同茶味都幾出。而呢兩款口感比較似介乎牛奶雪糕同雪葩之間，非常冰涼。

溫和口味：北海道函館3.7鮮奶雪糕、法國藍莓芝士

鮮奶味*雖然傳統啲，但一直有捧場客，而品牌選用北海道函館3.7鮮奶製作，奶香味明顯，質感亦幼滑得多。而法國藍莓芝士味嘅海報呈現藍色，但實製係偏柔和嘅紫藍色，味道幾清新，唔會過甜，但芝士味就唔算好明顯。不過因加入法國藍莓果肉同忌廉芝士製作，口感相對結實。

*鮮奶雪糕設有多款配搭，如加入Oreo、黑糖珍奶、黑松露等（$48-88）。
#芫荽、維他檸檬茶、法國藍莓芝士為期間限定口味（各$45）

8大系列特飲

品牌亦供應逾30款特飲，陪大家渡過炎炎夏日。包搭人氣楊枝甘露系列、芝芝系列、MIX系列等，$22起就有交易。

芝芝系列（$28[M] / $32[L]）配有6款水果口味，而最受歡迎嘅芒果味用上大量芒果肉打成，再加上2湯勺芝士奶蓋，夠晒誠意。

楊枝甘露系列（$28[M] / $32[L]）有6款水果口味，可以自選鳳梨、火龍果、草莓等。當然芒果、西柚、西米等標配嘅楊枝甘露配料都有啦。

果茶系列（$29[L]）都有4款口味，開飯仔就試咗熱情百香果茶，包括百香果、鳳梨、香橙、青檸檬等，入口果味比茶味濃厚得多，而且唔係死甜，可見非常足料。

Digreen
地址: 旺角花園街7號地下7C及7D號舖

文：Cathy
相、片：Yan Yan