《烈火雄心II》張可頤係經典！重溫無綫劇集救護員角色

無綫拍攝紀律部隊為題材嘅劇集，一直深受觀眾歡迎。今次無綫搵馬德鐘回巢拍台慶劇《跳躍生命線》飾演救護總隊目，令觀眾了解救護員嘅工作。今日就同大家重溫一下邊位藝人飾演嘅救護員令人留下深刻印象啦！

《烈火雄心II》張可頤 飾演鍾茵怡（Chris）

如果要講救護員角色，相信唔少人都會諗起張可頤，因為佢劇中嘅造型真係又靚又型。《烈火雄心II》雖然以消防做背景，不過張可頤飾演嘅救護隊目鍾茵怡同樣搶眼，鍾茵怡係一個對工作有熱誠、有原則、警覺性高，但係有時因為過份認真同倔強，令人覺得有啲難頂。佢同王喜飾演消防員紀德田係鬥氣冤家，經常互相鬥嘴，不過之後慢慢改觀，仲成為佢嘅女朋友。鍾茵怡負責駕駛急救電單車，跑喺救護工作嘅最前線，有突發事都要第一時間到達現埸，拯救傷者，十分專業。

《跳躍生命線》馬德鐘 飾演麥在田

「馬神」馬德鐘喺《跳躍生命線》中飾演救護總隊目麥在田，佢做事認真、細心、要求下屬依足規矩辦事、公私分明、對屋企人愛護有加、父兼母職照顧囡囡，係絕世好男人。雖然老婆（李佳芯飾演）喺第一集因為交通意外慘死，不過佢仍然努力拯救醉駕司機。劇中帥氣十足，充滿熟男魅力，著起制服特別入型入格，「馬神」真係咩職業都駕馭得到。

《棟仁的時光》唐詩詠 飾演程敏琦（Kris）

唐詩詠喺劇集《 棟仁的時光》中飾演救護員Kris，但劇中只得一部分講救護，大部分都係講Kris想搵返未婚夫Sam（楊潮凱飾），同袁偉豪飾演嘅曾棟仁點樣偷人地時間去換取性命。劇中Kris係一個善良又熱血嘅救護員，好似有一幕就係佢淋住雨好努力幫外傭搵返初生BB。

《烈火雄心III》黃嘉樂

劇集同樣以消防員為主，而黃嘉樂就係飾演救護隊目高浩南，劇中開頭佢憤世嫉俗、經常怨天尤人、從來唔會檢討自己嘅問題。當經歷生死巨變之後，佢搵到人生嘅正確方向，努力向上，仲成為一個有理想同有抱負嘅救護員。雖然唔係講太多救護員嘅工作，但佢好外形討好，又靚仔幾有新鮮感，成功吸引觀眾。