無制限探險隊丨 Mike導為黃金畫面搵命博 腹肌擋子彈受傷流血
以「黃金畫面」為關鍵主題嘅ViuTV節目《無制限探險隊》由「格仔導演」劉諾衡(Mike導)主理,並搵嚟P1X3L成員Marco(葉振弘)、「小薯茄」程人富及《全民造星IV》曾任醫生嘅參賽者「咖喱」黃雅慧(Kelly) 擔任主持,帶大家遠赴非洲唔同嘅國家,拍攝野外生態同體驗野外歷奇生活。喺噚晚(23日)播出嘅第四集,Mike導為「黃金畫面」不惜脫下防彈板,以身試子彈,仲搞到受傷流血,嚇親唔少網民!
節目組喺噚晚播出嗰集深入人稱罪惡之城嘅南非城鎮 - 蘭加鎮(Township Langa),佢哋試坐當地的士之外,仲試食當地名物燒烤羊腸,除咗Marco強顏歡笑話:「Very good」之外,其他幕前幕後人員都食到面容扭曲,更有幕後表示羊腸入面唔係肥膏而係屎,及同食屎嘅感覺差唔多。之後,節目組有幸出席當地人嘅盛宴,當地人即將生劏一隻羊慶祝,呢個場面真係唔係個個接受得到,當中程人富更有感而發,而咖喱就表示既好奇又驚。之後,當地人仲拎出自家釀製嘅粉紅色酒同節目開槍組一齊飲,雖然咖喱表示唔建議飲用,不過大家都有飲,仲玩得相當盡興。
去到第二節,節目嘅氣氛變得緊張,因為Mike導親自上陣做「真人避彈衣試驗」,佢首先喺槍械專家Dolf指引下,著上避彈衣測試功效,不過Dolf連環開槍後,Mike導覺得不痛不癢,兼嫌畫面唔夠震撼,大叫:「交戲都救唔到」。於是為黃金畫面搵命博嘅Mike導竟然建議脫下防彈板,試被橡膠子彈射擊嘅感覺,雖然團隊都擔心佢安全而反對,不過佢依然一意孤行,實行以身試子彈。
喺Dolf開槍前,一向大膽嘅Mike導就表示如果自己頂唔順會舉手叫停。當Dolf開咗一槍後,Mike導即時痛到大叫,並舉手叫停,之後仲不停紮紮跳。節目組人員要求Mike導脫下避彈衣,嗰一刻先發現橡膠子彈已經入肉。而喺現場候命嘅救護人員就即時為佢洗傷口、打針及取出子彈,之後再由咖喱為佢縫針。事後,Mike導問有冇後悔時,佢就話完全冇後悔,因為而家佢個人冇事,並承認嗰一剎那被拍攝黃金畫面冲昏頭腦,好彩最後件事向好一方面呈現。
節目出街後,唔少網民留言表示尊重,不過好希望Mike導下次唔好搵命搏,因為大家都好擔心佢嘅安全,例如「睇完第4集,見到你搵命搏黃金畫面,心痛!好彩你無事咋!以後唔好再亂嚟喇!嚇死家人、朋友、同事、觀眾!」、「玩屎尿屁好了,求求你,玩命真係唔好,有咩事只會令愛錫你嘅大家擔心。第四集真係嚇到個心離一離,真的真的下次未必有咁好彩,仲想睇米導拍更多更多的好作品」、「Mike導~下次咪咁癲啦!觀眾仲想睇到你更多嘅創作!」、「真正黃金畫面,但係會有身生命危險,不要再有下次,我們仍然繼續要睇你(Mike導)和團隊的製作。」、「唔好搵命搏,大家,包括歡眾都會擔心你架想睇黃金畫面,但唔想見到你地受傷,尊重和欣賞你的拼搏,但唔好再試」、「Respect,用心良苦!」、「睇到大叫出嚟,大癲黃金畫面,Mike」、「Mike 導真係為咗黃金畫面。真係利害。」、「respect~但不要再有下次~」、「好顛(癲),respect mike」、「好聽就挑戰自己 其實係玩命」及「呢下真心玩命」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!