【熱血新人衰衝動】《跳躍生命線》何廣沛有冇機會取代吳卓羲成為新一代衝動KOL？

無綫台慶劇《跳躍生命線》由「馬神」馬德鐘帶領劉佩玥、何廣沛、張曦雯及陳瀅等人主演，劇集以救護員為題材，播出以嚟都成為全城熱門討論話題。除咗有最搶鏡飾演麥在田（在哥）嘅馬德鐘之外，何廣沛飾演嘅卓家傑（傑仔）都同樣令觀眾留下深刻印象。因為何廣沛喺劇中飾演一個有熱誠但衰衝動又感情用事嘅新紮救護員，經常感情用事而做出魯莽行為，唔少網民都笑佢係新一代「衝動KOL」，有機會取代吳卓羲嘅地位。

最新播出兩集嘅劇情已經講到學員成功畢業，正式投入救護生涯，滿腔熱誠嘅傑仔同雄姐（張彥博飾）仲一齊被派去長沙灣救護站。傑仔喺第一日就安排同在哥一齊出車，第一次出車嘅case就係明叔明嬸（陳榮峻及吳香倫飾），喺幫明叔檢查嘅時候，傑仔想用輕鬆嘅態度去檢查，等明叔可以冇咁緊張，期間同佢哋傾計又唱歌，令在哥好不滿。因為咁樣會被人唔專業同唔誠懇嘅感覺，所以喺救護車被訓示，但係傑仔仲駁嘴駁舌話安慰傷者都係佢哋工作嘅一部分。

之後，明嬸突然喺屋企昏迷，在哥佢哋再次到達明叔屋企為明嬸做急救，明嬸更要送往醫院急救，明叔因為行動不便，所以在哥就叫他之後自己搭的士去醫院。喺等𨋢期間，明叔好希望可以送明嬸最後一程，傑仔眼見佢哋感情深厚，所以擅自跑去孭明叔，等佢可以跟車。雖然佢係出於好心，但佢擅自行動，如果跌倒嘅話就會多2個人受傷。離開醫院後，在哥就話救護員做嘢係有規有矩，但係傑仔就唔明自己錯喺邊，最後在哥仲話做救護員每日面對好多生生死死，如果每次見到有人死都咁情緒化同感情用事嘅話，佢覺得傑仔唔適合做救護員。

喺噚晚嗰集，傑仔再一次同在哥一齊出車出勤，期間有車禍發生，傑仔冇睇清楚現場環境下，一支箭咁衝去架漏緊油嘅車度救拯救傷者，連在哥叫佢唔好過去都聽唔到。最後在哥佢哋喺發生爆炸前成功救到佢哋，差啲全車人俾佢害死，但係傑仔就唔明仲再問在哥佢救人有錯咩！

傑仔成日感情用事又衝動，真係遲早出事！之前有網民列出無綫警匪片10大特色，其中一項就係「吳卓羲必曾因衝動累事」，睇嚟遲啲可能會有埋「何廣沛必曾因衝動累事」事件薄。