爆餡腐皮壽司店中環重開!新增創意卷物+多款小食 恐龍x森林主題兩層高新店

·3 分鐘文章

喺中環想食日本菜,最近又多一個新選擇啦。呢間主打日式腐皮壽司嘅餐廳由銅鑼灣搬過嚟Soho區,唔單止由立食店變成兩層高、以恐龍同森林為裝修主題嘅餐廳,Menu仲多咗好多選擇。無論係Lunch Time嚟食個腐皮壽司定食,定放工嚟飲杯嘢配創意卷物都得,得咗!

以恐龍同森林為裝修主題嘅餐廳
以恐龍同森林為裝修主題嘅餐廳

Hungry Dino新店位於中環些利街,UG層拉開玻璃店門就係廚房同立食區,想坐低慢慢食就可以上一樓,保留恐龍Logo加上森林主題裝修,加埋落地大玻璃窗,又有燈箱、霓虹燈等打卡位,感覺舒適又有玩味。

腐皮御饍+3切刺身定食
腐皮御饍+3切刺身定食

腐皮御饍+3切刺身定食(Lunch Set $169)

最出名嘅腐皮壽司當然有得留低,可以單點亦有套餐,好似開飯仔揀嘅呢個Lunch Set就有蟹膏三文魚子、明太子三文魚、微辣吞拿魚、黑松露帶子、明太子厚燒玉子,共五件腐皮壽司配刺身、伴菜同茶。壽司用嘅日本腐皮會先用高湯浸過,降低甜度同時可以更襯托出海鮮嘅鮮味。壽司飯就選用秋田小町米,口感軟糯。

蟹膏三文魚子嘅蟹膏鮮味同鹹香非常突出,加上一粒粒喺口腔裡面爆破嘅三文魚子,係令人印象最深刻嘅一款。明太子厚燒玉子當中嘅明太子鹹香辛辣,帶出玉子同腐皮嘅甜味。微辣吞拿魚同明太子三文魚調味得宜,食得出魚肉本身嘅鮮味。黑松露帶子嘅黑松露醬畀得夠爽手,香味濃郁。

焦糖雞蛋布甸
焦糖雞蛋布甸

焦糖雞蛋布甸(Lunch Set +$52,單點$62)

自家製焦糖雞蛋布甸口感Creamy偏實,勝在蛋香濃郁,配搭味道苦甜嘅焦糖醬同口感輕盈嘅忌廉,整體甜而不膩。

西雅圖鬼妹
西雅圖鬼妹

西雅圖鬼妹($128/份,$68/半份)

新店大咗之餘仲多咗唔少食物選擇,特別係卷物有好多唔同配搭!呢款西雅圖鬼妹即係火炙牛油果三文魚腩,上面大大件火炙三文魚腩肉嫩肥美,加上牛油果、芝士、青瓜等增加口感層次,豐富得嚟又唔會覺得膩。

德仔牛仔
德仔牛仔

德仔牛仔($84/份,$48/半份)

而德仔牛仔真身係洋風烤牛肉卷物,中間嘅安格斯肥牛肉味香濃,帶少少筋位更有咬口。配搭味道鹹甜嘅醬汁,減少肥牛嘅油膩感之餘又更惹味。

日式鰻魚蛋包飯
日式鰻魚蛋包飯

日式鰻魚蛋包飯($186)

原條鰻魚上枱視覺效果一流!唔單止賣相吸引,鰻魚肉亦夠厚身,加上香甜蒲燒醬汁令人食指大動。半熟雞蛋口感滑溜,不過如果可以畀多少少醬汁撈飯食就更好喇嘻嘻。

奶蓋白玉烏龍
奶蓋白玉烏龍

奶蓋白玉烏龍($52)

白玉口感軟糯,記得相機打卡後先食,如果唔係擺得太耐就有可能會變硬啦。下面係奶蓋烏龍,口感柔滑茶香突出。最抵讃嘅奶蓋面嘅餅碎增加口感層次,整體甜度又啱啱好。

蘋果白桃梳打
蘋果白桃梳打

蘋果白桃梳打($52)

夏天想消暑就可以點呢杯蘋果白桃梳打,桃味自然香甜,加上爽口嘅蘋果肉,同有氣泡感嘅梳打水,清新怡人。

Hungry Dino
Hungry Dino

Hungry Dino
地址:中環些利街2-4號LL Tower地舖及1樓

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能