王宗堯太太小食店下周二起停業 強調無欠債欠租 受友利冰室牽連仍表感激

藝人王宗堯同太太Julia去年10月喺太子開設小食店Happy Belly ，現時Julia主力打理鋪頭生意。Julia日前喺IG post出一張王宗堯仍然喺鋪頭開工嘅相片，並發文寫道「關於業務去向，請容許我稍後再正式向大家公布」、「希望爭取時間多啲見到大家啦」，言詞之間似乎暗示小食店經營出現變化，唔少網民都留言打氣。

今日Happy Belly 再喺IG交代將於7月9日起暫停營業，原因同長期合作嘅食肆友利冰室有關。「本店為了配合業主追討友利欠租及收回物業 (始創中心B02-06鋪) 程序，本店將於 2024年7月9日起暫停營業，直至另行通告。」

Happy Belly 喺聲明中表明「Happy Belly 屬於獨立營運，自本店成立以來，從未涉及任何債務，欠款或營運上之問題」。同Happy Belly 合作多時嘅食肆友利冰室，近期被指拖欠店鋪租金、員工薪水以及強積金供款，甚至傳出東主走數離港嘅消息。友利嘅員工六月底發文指「太子及荔枝角分店物資已耗盡，無法繼續如常運作，所以兩間分店於即日(6月29日)開始暫停營業，直至另行通知。散聚有時，感謝支持，江湖再見 友利店員字」。王宗堯太太Julia私人IG都有轉發友利呢篇帖文，並且寫道「我諗…我都應該好快就可以真正放一個假了」。

雖然因受友利影響營運，但Happy Belly 嘅聲明中仍然感激友利冰室，更寫道「如果沒有友利冰室，就沒有Happy Belly 」。Happy Belly 嘅小食店位置，正係友利太子店旁邊，早前2間食肆更合作賣糉。而Julia 日前post出嘅照片中，唔止見到王宗堯，友利老闆「爆炸頭」都喺相入面，當時各人仲有講有笑。

王宗堯年初因2019年七一衝擊立法會案被控暴動罪成立，今年三月中被判囚74個月。王宗堯喺案件審訊期間，同Julia開設Happy Belly。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！