王敏奕 做歌手認自私

藝人王敏奕演而優則唱，她承認當歌手的決定自私，雖然老公曾國祥未必會好開心，但抱着「你快樂所以我快樂」心態支持她追夢。她又自嘲唱歌沒本事爭一姐，故從不擔心招惹是非，會以偶像容祖兒為奮鬥目標！

自《女人俱樂部》後，王敏奕（Venus）睽違6年再度接拍無綫劇《香港愛情故事》，角色由純情學生妹變成愛玩一夜情的叛逆攝影師，她坦承意識上是入行以來最大膽一次：「同黃子恆有一場激情戲，好似『動作片』咁，但好多都係借位，真正有接吻戲係同謝東閔，有3場。（已經係底線？）覺得有挑戰，但係OK，人大咗接受程度高咗，幾年前未必做到同冇說服力。」

談到愛情，Venus自認以前佔有欲強，非常需要另一半關注，但跟曾國祥由拍拖到結婚7年間，經常分隔異地，最長試過4個月有多，她稱猶記得拍拖半年時第一次分開半個月已很難受，不過現在都已習慣：「我好少會問對方做緊乜，因為我總會知佢做緊乜，唔會有一刻想搵但搵唔到對方。」雙方更沒有7年之癢，甚至從未鬧交：「好多人覺得結婚搞婚禮一定會鬧交，但都冇，我會喺佢有主見時，我冇諗法；喺佢冇諗法時，我就有主見！而且佢真係想我開心，佢話你開心就做啦！佢知我鍾意貓，但佢對貓毛敏感都叫我養。」

爭一姐？未夠資格

而在工作上，她不曾問老公意見，加盟星夢娛樂做歌手亦如是：「兩個老闆都話我唱埋歌會更忙，婚後會唔會想要多啲私人時間？我嗰刻好自私咁話唔會，我事業心好重，好感激佢（曾國祥）覺得我快樂嘅事就做咗先，佢冇話你太忙唔好，佢都有表達過『或者我未必好開心，但我見到你開心就做啦！』」

星夢女歌手眾多，包括菊梓喬、吳若希及JW等，問會否擔心傳出爭一姐是非？Venus非常淡定地說：「唔驚，因為我完全冇能力去爭，我係一個好好彩有個唱歌機會嘅演員，我乜都未有，點同人競爭？我要喺佢哋身上學習。（以邊位歌手為目標？）我好鍾意容祖兒，覺得如果做歌手，我要好似佢咁努力，對人對事都正面積極。」