疫境幾乎零收入!陳奕迅自爆患病:戶口好耐冇見過加號

·3 分鐘文章
Eason都呻.........窮呀!
Eason都呻.........窮呀!

「吹神」陳奕迅因疫情幾乎停工一年,只接過一個廣告,故自爆患上「荷包乾硬化」及「急性發錢寒」,笑言戶口很久沒見過加號!談到新歌MV中要跳現代舞,他笑言自己身手靈活,只是有某身體部位太「粗」!

歌神陳奕迅(Eason)推出廣東新歌《致明日的舞》,希望透過音樂令大家放鬆面對疫情下的生活。談到疫情對他的影響,問到近一年都停工?他即自爆患病:「我患咗『荷包乾硬化』同『急性發錢寒』,哈哈,其實好多人都係咁,只係我藉機會公開呢個病。(蝕咗幾多錢?)唔知,之前收入好平均,但好耐冇見到有加號,但我有積穀防饑。(幾時恢復工作?)呢年以嚟淨係拍過快餐店廣告同錄音。」

未知幾時開番個唱

問到去年取消的跨年演唱會何時會舉行?他笑言知道有傳楊千嬅爭贏他奪得今年年尾紅館檔期:「但我冇爭過,我冇入紙申請。(幾時開番演唱會?)講真未知係咪真係開到,我知道2021年應該冇乜期,因為聽聞今年取消嗰啲可以優先揀番出年,但我係上年,而且我要book好長嘅期,如果唔係補唔番製作費,哈哈,上年開25場,我要35-40日先得,因為預中間要抖。(心急開騷?)已經唔急啦。」

運動操fit

但Eason亦坦言疫情帶來的好處是多了時間在家做運動,比之前fit了很多的他表示:「我鍾意滑雪同打網球,如果螺絲生鏽就做唔到,所以想keep住螺絲、關節靈活,如果我60歲有40幾歲嘅身體幾好。」

同太太各自有空間

他亦謂現時多了時間與狗狗相處,亦與家人傾多了偈,問到太太徐濠縈可有嫌他煩?他笑言:「佢唔使對住我架,我哋好free,屋企每人都有自己角落頭。」講到他之前在家扮蜘蛛俠?他澄清不是其家:「嗰度係公司,有盞燈點都熄唔到,所以我上去(閣樓)check下。」

談到MV中有代表不同界別、年紀的舞者,表達社會上不同人士面對不同挫折及壓力,帶出從創傷、失敗中學習就會重拾好心情。他又坦言自己有在入面跳「現代舞」,笑言:「即係情緒帶動嘅舞蹈,我畀朋友睇個MV,佢睇得好投入,但我一出現佢就笑咗,可能佢未見過我跳現代舞。(跳舞好難?)唔係,其實我身體幾靈活,係略為粗咗少少啫,個手臂,哈哈。」

場地提供:香港瑰麗酒店Rosewood Hong Kong

化妝:Karry Wong

髮型:Derek Li @ Xenter