白衣女童現家中 莊思敏愛犬離奇失蹤 林夏薇檳城拍戲 「06」準時撞邪

鬼節將至，無綫藝人林夏薇、莊思敏等都曾經遇過靈異事件，薇薇在馬來西亞檳城拍劇時中了「06」魔咒，而莊思敏家中就有看不見的「小朋友」亂入。

農曆七月十四，相傳是鬼門關大開的日子，不少藝人都曾遇過一些解釋不到的靈異事。林夏薇早年在檳城遇過詭異事件，她憶述：「嗰時拍《單戀雙城》，本來間酒店房都好正常，但唔知點解突然有一日朝早6點，床頭個電子鐘突然有把男人聲喺度廣播，因為好嘈，我撳唔熄，索性掹咗條電線，點知就轉咗女聲，但當時因為好攰，我冇理到繼續瞓。」

怎料翌日朝早6時正鬧鐘又無故響起，她雖不想理會，但最後忍不住說了句『唔好意思呀』，電子鐘於往後就沒有再無故響鬧，薇薇說：「我懷疑係酒店執房時，有嘢入咗嚟。」到第3日開工搭電梯時，電梯閂門後完全冇反應，她出去轉乘另一部電梯到樓下時，卻發現原先冇反應的電梯竟在樓下閂門，非常詭異，而最「巧合」是當時正好又是早上6時。接二連三發生奇怪事，薇薇返港後更病足1個月，最終搵師傅問津，對方指確實「有啲嘢」，幸已成過去，總算捱過一劫。

開門同「朋友仔」鬥力

而莊思敏則在家中遇到怪事，先有工人姐姐多次表示見到有位白衣女孩在走廊行來行去，其後她的愛犬試過2次突然不見了，最後離奇地出現在雜物房，她說：「好奇怪囉，佢入咗去都唔識得閂門啦！」之後她有一次到雜物房找東西，因為心驚驚，故開晒所有燈，但房門卻突然閂埋，她即走去開門，卻覺得似有人跟她「鬥力」，她說：「係有啲重量，唔想畀我開門咁！之後有請咗師傅嚟睇，佢確定有啲『朋友仔』喺度住，請咗佢走之後，再冇發生過古靈精怪嘅事喇！」