香港字體｜囚犯手寫路牌全港剩600塊 道路迷眾籌發行「監獄體」

【Yahoo新聞・香港字體系列報道】有一種字體看似毫不顯眼，卻是指路明燈，正是路牌「監獄體」。監獄體修復師邱益彰（Gary）形容這種字體予人「土炮」、粗糙之感，就像「貨van司機」。監獄體由囚犯逐字以刀具在金屬板上𠝹成，風格一致又不失獨特。直至1997年電腦字取代人手造字，監獄體路牌變得碩果僅存，現時全港只剩約600塊。邱2016年開始將字體修復，目標造至少7,000字，計劃今年內眾籌發行監獄體。

文字記者：盧珮瑤

攝影記者：wildchild

Gary身兼「道路研究社」社長，從小喜歡觀察路牌，「去過邊度我都會畫返出嚟」。他長大後發現路牌字體別樹一格，2016年起為路牌拍照，在電腦上按圖畫字。在友人鼓勵下，他透過道路研究社徵集網民拍到的「監獄體」路牌照片，展開造字計劃。

橫筆像喇叭 「頭尾落重筆」

監獄體的最大特色，為字體橫筆大多有「喇叭口」，「頭同尾會有少少翹出嚟，中間部分有啲凹咗入去，好似喇叭形狀咁」。邱解釋此舉令字體更顯眼，例如「壽」、「酬」，「呢啲多筆劃嘅字就要偷幼，但太幼就會令個字睇唔到」，同時增添手寫字「頭尾落重筆」的味道，「所以當時嘅鉛字黑體都會有喇叭口，打開舊報紙都係呢種風格」。相比其他字體，監獄體的視覺重心較高。修復初期，邱除了按路牌造字，也嘗試拼湊常用字，例如造「釁」字最具挑戰，「我用葵『興』、『醫』字、加拿『芬』道啲字去砌，要偷位將某啲筆劃變幼」。

監獄體多異體字 受「朗」字啟發

邱小時跟路牌學寫「朗」字，第一筆並非一點，而是一橫，「畀老師話我錯」。2010年更有區議員誤指路牌上「朗」的異體字為錯字，路政署遂以電腦貼紙遮蓋，從此又多一個監獄體不見天日。邱慨嘆，異體字屬香港特色，「就係因為以前香港無跟日本、台灣規範字，後來被電腦化咗，尤其係台灣Big5（五大碼）嘅寫法，啲人就以為係寫錯」。他舉例，另一路牌常見異體字為「塲」字，不少已被遮蓋或拆掉，「想致敬返香港路牌上出現過嘅異體字，有啲想幫佢平反」。因此他未來發行的監獄體也有異體字。

今年內眾籌發行 望用於電影道具

道路與字體命脈相連，邱指出，監獄體被推敲是在1997年5月消失，「點解肯定係呢個時期，因為最後一塊係寫西隧，西隧係嗰陣通車，而隧道香港（島）入口嗰邊已經用晒電腦字」。現時沙田區較多監獄體路牌，「因為新市鎮，啲路唔使成日改，嗰區監獄體路牌可能已經有40年歷史」。

邱現完成4,000多字，目標製作至少7,000字，今年內眾籌發行字體，當中包括不少潮語或口語，連「厹」都有，「用『九龍公園』咁樣砌出嚟！」他又明言不會做簡體字，「簡體字破壞咗個美感，我客源多數都係香港人，就算係大陸讀者都係鍾意繁體字」。

現時監獄體見於書作及桌遊，邱望打入電影市場，「睇戲好鍾意睇人啲道具，啲字體上硬係爭少少，例如啟德機場用咗標楷體咁，希望電影道具可以逼真少少，路牌可以用監獄體，六七十年代街景就可以用李漢港楷、爆北魏體」。

與《Yahoo新聞》讀者分享：

【監獄體再現計劃】

https://www.facebook.com/RoadResearch

【「見字飲啡」字體展】

日期：即日起至4月24日

地點：Contrast Cafe（長沙灣福榮街512-518號地下）