盧敏儀陪李龍基為王青霞案聽審 退出幕前轉型做大狀曾為圈中人打官司

藝人李龍基嘅36歲未婚妻王青霞（Chris）被控逾期居留、使用虛假文書及違反逗留期間接受工作等合共7項罪名，案件今日喺沙田裁判法院續審，王青霞承認其中違反逗留條件、使用虛假文書、管有虛假文書、向根據或為執行入境條例第II部而合法行事的入境事務主任作出虛假申述、在香港入境時對其施加的逗留期限，留在香港接受僱傭工作共5項罪名，法官宣布判王青霞入獄25個月。前TVB藝人，現為大律師嘅盧敏儀陪同李龍基到庭王青霞聽審。

63歲嘅盧敏儀(Money)轉型成為大律師多年，Chris嘅案件以外仲曾經為多位圈中人出任代表律師。

盧敏儀中學時期為港台節目《少年警訊》擔任主持，後來加入TVB成為藝員，曾參演多套劇集，但最為觀眾記得嘅係Money年紀輕輕已經成為大show司儀，甚有大將之風。當時TVB 三大show《新秀歌唱比賽》、《勁歌金曲頒獎典禮》以至《萬千星輝頒獎典禮》都曾經由盧敏儀擔任主持。1997年盧敏儀同電影導演孫敬安結婚，婚後淡出幕前，後來喺港大專業進修學院入讀英國倫敦大學法律學士校外課程，2001年畢業後再升讀碩士，2003年畢業後投身法律界並成為大律師，現時喺著名大狀清洪嘅律師樓工作。

2011年鍾鎮濤同范姜因為同鍾前妻章小蕙胞妹章小婉發生衝突而被檢控，阿B同范姜搵咗盧敏儀做代表律師，最後二人獲撤控，鍾鎮濤散庭後曾大讚盧敏儀好厲害。另外曾志偉喺2018年控告內地「MODEL教母」韓穎華誹謗，當時盧敏儀曾經為曾志偉提供協助。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！