直播靈接觸丨歐陽震華11年前肺炎昏迷入ICU 床邊驚見「無臉小矮人」

歐陽震華(Bobby)2013年農曆年期間因為急性肺炎入院，一度被送入深切治療部。Bobby太太傅潔嫻仲被傳媒影到憂心落淚，好在後來逃出鬼門關。尋晚歐陽震華為梁思浩主持嘅TVB PLUS節目《直播靈接觸》做嘉賓，提及當年昏迷時嘅經歷。Bobby話係食物倒流入咗氣管令佢昏迷，佢醒返先知自己喺邊，開頭好驚係中風。

Bobby話昏迷期間仍有知覺，感覺到醫護搬佢話床、照瞳孔等，但係有兩個景象到而家都記得。歐陽震華首先記得好似拍戲俯瞰角度(TOP SHOT)咁睇住自己，過程得一兩秒。接觸過唔少靈異事嘅梁思浩聽到就話「一TOP SHOT就走架啦」。

另一個令歐陽震華記憶猶新嘅畫面係，佢見到有班啞黑色、好似棋子咁嘅小矮人，喺床邊圍住交頭接耳，好似商量緊啲嘢。Bobby話嗰班「小矮人」塊面係平嘅，冇眼耳口鼻，唔係憂愁或者恐怖，同其他人所講嘅「牛頭馬面」唔同。「有啲人將佢變做牛頭馬面……其實睇你個人心態，人有時自己嚇自己」。至於「小矮人」傾咩？Bobby事後估計「佢哋會唔會商量緊『帶唔帶佢走呀』？，一個就『唔好，仲有用嘅』，一個就『係啦，佢為觀眾帶嚟咁多歡樂。吞錯格啫。』」。

2021年歐陽震華喺TVB《諸朋好友》節目都有憶述昏迷一事，Bobby話出事前嗰排拍緊同老拍檔關詠荷合演嘅《情逆三世緣》，劇組歲晚收爐，於是Bobby把握機會休息，年初二晚同朋友打邊爐密密食，之後飲咗少少酒就去「恰一恰」等其他人到場，點知睡夢中食物吞錯格入咗肺搞到昏迷。Bobby話好在家人及時發現，見到佢塊面紫晒，立即送佢去醫院。節目中，Bobby話送院後嘅急救過程當中自己仲有意識，但之後睇到「靈魂出竅」，後來醫生同佢講「你天濛光嗰陣時走咗㗎啦，但你8、9點又返嚟」，原來嗰陣血壓係咁跌，過一陣先再升返。醫生又話可能Bobby係演員捱慣眼瞓，一叫就醒，而Bobby醒返之後唔敢再闔埋眼，驚又再昏迷！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！