直播靈接觸︳62歲鄧浩光激瘦現身講拍劇怪事 曾與顏福偉結伴夜蒲傳緋聞

梁思浩主持嘅TVB PLUS節目《直播靈接觸》，尋晚搵到久未露面嘅鄧浩光同「泰國通」胡慧沖做嘉賓。62歲嘅鄧浩光比之前更為消瘦，但造型十足日本男星，完全睇唔出已經「登六」！

鄧浩光同梁思浩相識多年，但原來同樣出身於TVB嘅鄧梁二人係喺亞視認識。節目中鄧浩光提到1989年同思浩一齊拍亞視劇集《望父成龍》，劇中鄧浩光演警察，有一場警匪追捕戲係喺火炭某商廈停車場拍攝。鄧浩光憶述拍到凌晨2點幾時，要演一場被賊車撞倒嘅戲，佢話綵排期間一直冇事，到正式拍之前有工作人員同鄧浩光講「勁喎，有咁多fans睇你拍戲」。但係鄧浩光話見唔到有外人在場，而且凌晨時份嘅火炭理應冇咩人，工作人員就以為因為拍動作場面「清場」所以先冇人圍觀。後來拍攝時，鄧浩光發生意外令手部虎口位受傷，甚至要抽一段腳筋修補，疤痕仍然清晰可見。出事後，話見到「fans探班」嘅工作人員同鄧浩光提起出事當晚情況，因此估計係咪有「朋友仔」搵替死鬼。

鄧浩光可以話係「方力申-1.0」，佢曾經係香港隊泳將，後來轉投娛樂圈，拍過《少女日記》等電影成為80年代男神之一。其後鄧浩光先後加入TVB及亞視，1998年重返TVB拍過多套劇集，包括《十月初五的月光》、《戀愛自由式》等。2006年鄧浩光轉戰商界，於好友顏福偉嘅白花油藥廠出任業務拓展經理，曾經親身上陣以爆肌身型拍攝白花油廣告，至2019年退休。

顏福偉同鄧浩光在公在私經常出雙入對，甚至影到喺好重「陽氣」嘅蒲點見佢地一齊出現，因此傳過緋聞。不過出咗櫃嘅顏福偉就回應過話，同鄧浩光8歲已經識，但鄧唔係佢嘅理想類型對象。而鄧浩光早於2002年已經同圈外女友結婚並育有一女，個女而家都就快二十歲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！