睇相佬呃你十年八年‭ ‬麥玲玲廢嗡事件簿

尋日係羅仲謙同楊怡嘅大喜日子，大家除咗留意由馬浚偉送出的3隻大過拳頭嘅金豬外，仲關注佢地婚後造人計劃，兩位新人都不避嫌，講明婚後不設防，希望可以三年抱兩，先嚟一個女，再生一個仔。有傳媒就搵咗玄學家麥玲玲批阿怡好生養，仲話「佢結完婚隨時今年或下年生」嘩，講完好似無講一樣，其實有無人覺得佢講野真係玄到有啲廢。所謂睇相佬呃你十年八年，麥玲玲廢嗡又豈止呢次，今日就等我哋一齊回顧下。

麥明詩林作離合糾纏長
眼見麥明詩林作嘅感情拖足咁耐，麥玲玲又出來抽一抽水，批算「林作同麥明詩會離合糾纏長時間」其實唔使你批，大家都睇到啦！

金多寶神燈
每逢金多寶麥玲玲都企出來，醒大家買六合彩貼士，好似幾點買、邊度買、著咩衫買，同買咩號碼，但講出來嘅號碼最多都係中一、兩個，亦有唔少網民視佢為神燈，避開該幾個數字。其實，明知貼唔中，就唔好吹到咁大啦。

英女皇一生衣食無憂
早前英女皇伊利沙伯二世90歲生日，麥玲玲出來話英女皇財運極旺，一生衣食無憂，是大富大貴之格局。有網民立即幫英女皇批命，重批到：「英女皇係女人」果然高手在民間，失敬失敬。

預測唐英年做特首
當年曾蔭權離任，全城相士預測邊個做特首，而麥玲玲嘅心水特首係唐英年，話梁振英雖有越戰越勇之象，但面相太單薄，貴人運弱，無咩機會當選喎。

相片來源：楊怡、星灿娱乐‭_‬温开龙‭ ‬＠微博