社內相親｜首集劇情輕鬆搞笑 Anson Lo被指妝容過白兼唔夠氣勢 網民：白過架golf車

ViuTV早前宣布開拍港版《社內相親》，仲搵嚟男團MIRROR人氣成員Edan（呂爵安）、Anson Lo（盧瀚霆）、陳漢娜及沈殷怡（Shirley）主演，令唔少網民大呼期待。劇集喺噚晚（27日）終於首播啦，劇情主要講述隱藏身份代替相親嘅職員與公司社長之間展開浪漫愛情喜劇故事。唔講咁多，而家就同大家睇下首集網民反應啦！

劇情輕鬆搞笑
《社內相親》喺噚晚就講到Timo（Anson Lo飾）被爺爺（羅家英飾）迫去相親，而Hollie（陳漢娜飾）就因細佬與鄰店老闆鬧交，更被要求賠償，所以答應好友陳映書（沈殷怡）代佢去相睇。不過估唔到相親嘅對象正正係自己公司嘅新上任CEO Timo，Hollie喺相睇期間刻意塑造自己係一個渣女，原本諗住可以搞砸呢場相睇，不過反而令Timo對佢有興趣，更決定同佢結婚。首播後，唔少網民留言大讚劇情好好笑及有本土元素，例如「其實第一集拍得幾好笑呀！相睇果part笑到癲喎 覺得Hanna做得好放」、「呢套拍得搞笑過韓版，開開心心笑吓就一集」、「劇情節奏都幾明快，暫時ok」、「都幾好睇呀 輕輕鬆鬆笑下咁」、「其實總括來講好睇喎，又幾好笑」、「劇情輕鬆，大致跟足原版又加入好多貼地元素，可以睇」及「台詞好港式貼地，好好笑，好睇」等等。

Anson Lo妝容過白兼唔夠氣勢
Anson Lo喺劇中飾演gofood飲食集團CEO姜泰武Timo，經常以一身西裝示人，性格高冷、固執又自戀。佢喺第一集已經多次出場，不過唔少網民就覺得佢嘅妝容過白，留言話：「太over 個妝」、「其實佢係咪得罪咗化妝師」、「真心太重妝，我老婆都話頂唔順」、「AL呢個look幾靚仔，不過化到太白」、「AL塊面白到」、「個樣白到嚇死人」、「白過個天」、「臉太白啦，好似一直反光」、「以為睇緊twilight」、「白過架golf車」、「anson lo男排女將嗰陣個樣都正正常常 做乜依家搞成咁」及「真係好恐怖 點解一定要化到咁白 一粒毛孔 一條頭髮絲都唔可以有 成套劇比個妝整衰哂」等等。另外，亦有網民認為佢暫時未能演繹出霸道總裁嘅感覺：「完全冇氣勢 唔識用聲」、「AL完全演唔到嗰種霸氣喎」、「完全chok唔到個霸氣總裁feel」、「AL做得唔夠驕傲」及「完全無總裁嗰種氣勢」等等。

陳漢娜演出有驚喜
陳漢娜（Hanna）喺劇中飾演孫賀利Hollie，係gofood公司冷凍食品開發部門嘅研究員，為人積極、體貼及充滿正能量，所以與同事們相處融洽。佢喺噚晚嗰集演出有驚喜，尤其係代替好友陳映書去相親嗰一幕，Hanna可以話係豁出去咁演繹渣女，結果引起網民熱烈討論，吩吩留言大讚佢好戲及成功駕馭角色，例如「Hanna好正！為佢而睇」、「好睇，Hanna做得好好」、「Hanna 好cute」、「Hannah好正 Carry到」、「Hana演技大爆發」、「比預期中好 好自然」、「hanna carry左大半套戲，家英哥第2」、「套劇真係靠hanna同家英哥carry」、「漢娜真係幾好戲」、「漢娜 有驚喜」、「本身覺得hanna做呢個角色唔太襯 但睇睇下又幾掂幾cute」、「Hanna 救返晒成套戲」、「Hanna 做得好，第一集每個造型都演得自然又好笑」、「Hanna做戲好好,唔會成日同一個表情眼神,好好睇!加油」及「套戲暫時真係算hanna頂住」等等。

沈殷怡好靚女
沈殷怡（Shirley）喺劇中飾演Hollie好朋友陳映書，佢成日俾爸爸逼去相親，不過佢自己就堅持只有搵到命中注定嘅愛情先會結婚，所以喺首集就搵Hollie代去相親。Shirley身為「ViuTV女神」，有外貌、有身材又有長腿，深得網民喜愛，所以佢一出場，網民就暴動式留言大讚佢好正，例如「shirley sham真係好正」、「SS 正到喊」、「SS真係女人都覺得佢好正 出咗兩幕都好正」、「SS 令到部電視機都靚左」及「SS同原裝韓版陳映書相比真係唔似，但好在靚樣搭夠！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！