社內相親｜Anson Lo陳漢娜重現經典親熱戲 網民：集體要求釋出Timo Hollie火辣加長版

ViuTV劇集《社內相親》由男團MIRROR人氣成員Anson Lo（盧瀚霆）、Edan（呂爵安）、陳漢娜（Hanna）及沈殷怡（Shirley）主演，唔經唔覺喺今晚就播出大結局。劇集改編自2020年韓國同名人氣愛情電視劇，雖然有大部份劇情都跟足韓版，不過仍然加入咗唔少香港本土元素，令觀眾睇起嚟更投入及有親切感。韓版嘅劇情有一段超激嘅火辣親熱戲，唔少網民喺港版開播後都留言表示期待，去到噚晚（14日）第14集Anson Lo同Hanna終於將呢一幕經典重現觀眾眼前啦！

噚晚劇情就講到Hollie因阿敏嘅妒忌心，喺網上被傳出一腳踏兩船，而呢個消息對公司造成負面影響，所以爺爺更加反對呢段感情，並要Hollie離開公司。Hollie被辭退後，自己一個人無意中去到一個對Timo嚟講十分重要嘅地方，從而令佢明白到自己遇到啲咩嘢，個心都會同Timo維繫住，Timo亦終於聯絡到Hollie，見到佢嗰陣時Timo就好緊張咁攬實對方。最後Hollie跟Timo返去佢嘅住處，並上演長達分半鐘嘅親熱戲，其間二人瘋狂咀咀，Timo更抱起Hollie嚟錫，最後Hollie喺床度除Timo件衫，騷出健碩嘅身形，睇到觀眾心心眼。

呢集播出後，雖然呢一幕唔係跟足韓版，不過唔少網民留言大讚Anson Lo身形好fit、畫面好sweet好睇兼唔夠喉，例如「咁攬好有feel」、「總裁好大隻」、「努力有眼見，身材非常正！」、「個背肌大癲！！真心勁！」、「身型好fit好好睇」、「Timo Hollie好浪漫好甜，畫面又靚又震撼，好想睇多啲唔夠喉」、「Timo同Hollie親熱戲份愛意洋溢﹐充滿美感﹐而且Anson Lo健美身型簡直100分。」、「跪求要求Timo失身加長版」、「Timo同Hollie嘅床戲唔夠喉呀，好想睇加長版」、「集體要求釋出Timo Hollie火辣加長版」、「個背肌大癲！！真心勁！」、「抱起身個幕經典重現啊！」 、「睇到心跳加速！」及「教主笑得好flirty，好誘惑」等等。

雖然韓版女主角都冇除衫，不過一班網民就嫌Hanna著太多衫，留言話「點解係女除男衫」、「Hanna少少都唔除有啲怪」、「抗議女角著太多衫」、「未睇過女仔著咁多衫既床戲」、「唔太合理啦，男嘅除哂，女嘅仲full 衫上陣」及「女既太多衫有點出戲」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！