【移民英國】職場文化要熟悉 今年失業率或升至15% 點算好?

·5 分鐘文章
【移民英國】職場文化要熟悉 今年失業率或升至15% 點算好?
【移民英國】職場文化要熟悉 今年失業率或升至15% 點算好?

早前一系列介紹移民英國文章後,從大家搵樓、返工、小朋友教育等都介紹過,不過人在異鄉,始終要重新適應當地文化。小朋友返學的話,上次提過英國學校中絕少歧視,家長們可以唔使太擔心;反之大人們自己返工又如何?今日為大家介紹一下英國職場文化,兼討論脫歐對英國經濟有幾大影響。

香港工作狂 小心犯眾憎

相信好多人都知香港人勤力度喺世界上數一數二,工時長、又捱得,老闆話一自己唔敢話二。不過大家去到英國就要習慣一下當地工作模式,如果一般辦公室工作,下午5點幾就已經可以收工,絕少OT,老闆就算要員工OT又或者臨收工畀嘢你做都係需要有合理解釋,因為員工會據理力爭甚至表示不滿而拒絕OT,絕非香港打工仔咁「鵪鶉」死忍。唔少移民英國嘅香港人都話,一開始極唔習慣可以準時收工,甚至唔敢比老細先走,但發現全Team得自己係「工作狂」的話,反而會令其他員工反感認為你「搏表現」犯眾憎,所以大家都係乖乖準時收工啦。

英國辦公室文化同香港好唔同,準時收工係基本。
英國辦公室文化同香港好唔同,準時收工係基本。
英國絕少工作狂,員工會據理力爭而拒絕OT。
英國絕少工作狂,員工會據理力爭而拒絕OT。

超多元文化 冇流利英文唔駛太擔心

好多人另一大擔憂就係自己英文水平未及以英文為母語嘅同事,怕被嫌棄或者睇唔起,大家其實可以放心。英國極為多元,一間公司之中可能有近半都係非本地人,來自世界各地五湖四海,好多都唔係以英語為母語,英文水平都只係應付到日常溝通就可以,當然要以完成到工作為先。英國可以話集四海之大成,職場上會面對來自世界上唔同國家嘅人,無論係客戶定同事都好,記得一定要尊重每個人嘅文化,同時唔好唔小心踩到對方而不自知。

英國一間公司隨時有一半都係非本地英國人。
英國一間公司隨時有一半都係非本地英國人。

放工後著重社交生活

打工仔普遍5、6點收工,不過好多人都選擇去酒吧(睇英國酒吧生意有幾好就知啦),基本上同事甚至上司都會去飲下嘢放鬆一下,不分階層都打成一片,成為公司唔同人之間嘅最佳溝通渠道,尤其係移民嘅朋友,去到最快認識同事嘅方法就係一齊去飲嘢。不過大家又唔需要擔心好似日本咁要不停飲酒,都話英國好尊重每個人嘅選擇,唔會強迫你做任何嘢(況且有唔少宗教係唔畀飲酒),所以可以選擇飲非酒精類飲品,唔使覺得唔好意思,最緊要人到。

英國人好多一放工就一齊落酒吧飲嘢,互相聯誼。
英國人好多一放工就一齊落酒吧飲嘢,互相聯誼。

脫歐後經濟大洗牌?

英國於今年1月31日正式脫離歐盟,有一年嘅過渡期,好多人擔心正式脫歐後,會有大批人士飯碗不保。脫歐代表英國再非歐盟成員,同樣歐盟其他國藉人士亦會失去於英國自由工作嘅權利。明年開始,所有原本居住及工作於英國嘅歐盟工人都會採用積分制,根據工作資歷、語言能力、年齡等去計分,唔夠分就唔能夠繼續於英國工作,預計會有數萬人失去工作,而呢班人大部分都係從事低技術工作,坦白講對香港移民人士或者係另一個過渡性嘅選擇。另一大問題就係新冠肺炎影響,可謂禍不單行令英國經濟陷入近300年來最嚴重危機,好多大企業都已經裁員,近日單單國內嘅航空業、零售業都已經裁減超過1萬個職位,根據英國經濟合作與發展組織推算,今年英國失業率將會達至15%,大家絕對要有心理準備,今年移民搵工的話一定十分困難。

脫歐後,預計有大批低技術歐盟國家人士要被迫離開英國。
脫歐後,預計有大批低技術歐盟國家人士要被迫離開英國。

或會出現BNO工作圏

今次BNO平權,預計5年內或會有30萬港人移民;有本身已經居於英國多年嘅香港移民就計劃籌備一個「BNO工作圈」,協助移民港人搵工作,例如由港人開嘅公司會招請新移民港人等,希望壯大工作圈及內循環消費,有如「唐人街」、「小印度」呢一類小型社區經濟圈,形成一個「小香港」自給自足,日後大家移民過去或者會更容易搵到工作。

有人希望好似唐人街咁成立一個「小香港」,吸引港人定居。
有人希望好似唐人街咁成立一個「小香港」,吸引港人定居。

更多相關文章

【移民英國】人離鄉賤?英國歧視移民有幾嚴重?

【移民英國】搵工由零開始從何入手?咩行業缺人?邊區人工高?

【移民英國】英國倫敦最佳預備學校 入名牌中學前必讀?

【移民英國】2020最佳英國中學排名 公立/私立 Top 10

【留英資訊】居英生活小幫手 7個不得不下載的實用app

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能