【移民英國】2020最佳英國中學排名 公立/私立 Top 10

移民畢竟係人生大事，除咗居住地點之外，有小朋友的話好多可能聚焦於學校問題。講真，家長們會考慮移民好大程度都係在於小朋友喺外國會更好教育，所以挑選學校可以講係重中之重，甚至係決定住邊之前已經要諗好嘅事。英國《每日郵報》就按全英國公立及私立學校於去年中考（GCSE）及高考（A-Level）考試成績，選出公文及私立中學Top 10 ，先為大家介紹頭3強吧！

公立第三位：牛津、劍橋大學搖籃

The Henrietta Barnett School

位處倫敦北部市郊巴奈特（Barnet），為全國排名頭5位之校區，當中合共有過百間中、小學，唔少牛津、劍橋學生都畢業於該地區嘅中學。呢間The Henrietta Barnett為女子中學，雖然於2012年先正式成校，但每年於公開試都考取極佳成績，92.1%於A-Level考獲A*-B成績，94.9%於中考考獲A*-A/7-9分。該校出名在於數學、古典文學及英國文學方面，而另一特色為學校中有一半學生母語都唔係英語，有唔少都係外來移民嘅小朋友。

網站：按這裡。

公立第二位：體育校隊同樣出色

Wilson’s School

位於倫敦瑟頓（Sutton）嘅Wilson’s School為全國知名傳統男校，亦被認為係精英搖籃，每年約3千多人爭186個學校。學校除咗學業成績出色之外，另一大賣點係兼顧體育及課外活動發展，其中學校足球隊、板球隊於國內頗有名氣。學校重點培養學生主動性，鼓勵學生多同老師互動，因此校內學習氣氛良好，加上各種課外活動，所以校園充滿活力，唔會「死讀書」，每位學生都可以發展自己喜愛嘅體育項目。

網站：按這裡。

公立第一位：傳統公立最強

Queen Elizabeth’s School

同樣位於巴奈特，學業成績比大部分私立學校仲要好。好處係非居住於附近地區都可以報讀，不過入學試如果有人同分，住得近則有優先權。學校為男校，但會間中選擇性收女生；擁有游泳池、足球場等設施，學校欖球隊於學界亦頗有名。學校由於入學競爭激烈，因此設有自己嘅入學試，去年3千多人報考，雖然有2千多人達到最低標準，但學校最後只收取180人，非常誇張。

網站：按這裡。

私立第三位：百年歷史 新舊共融

Brighton College

位於南部布萊頓（Brighton）於1845成立，為歷史悠久嘅男女寄宿學校。學校位處海傍，校園建築為哥德式設計，環境極為優美。學校提供全面寄宿服務，即所有學生都可於全個學期內留宿學校，而設施十分豐富，包括有醫生護士駐場嘅健康中心、運動室、健身室、圖書館、音樂室等均可自由使用。年頭仲有全新落成嘅「運動及科學大樓」，更由荷蘭著名設計公司OMA負責。學校曾於2008年被《時代雜誌》選為英國最佳學校之一，香港亦有唔少名人例如DJ森美個仔都係就讀該校。網站：按這裡。

7

校園建築為哥德式設計，本身已經係歷史建築。

8

年頭落成「運動及科學大樓」，設備完善。

私立第二位：飛躍進步 倫敦市區名校

Godolphin and Latymer School

位於倫敦市中心Hammersmith，雖然於市區但仍然擁有極大校園。學校為女校，去年公開考試成績非常好，因此排名直接由第6跳升至第2位。根據英國《最佳學校指南》（The Good School Guide）中指出學校「學習氣氛極佳，學術能力極強」，相信因為學校宗旨為培養學生好奇心及主動精神，同時標榜學生要有獨立思考、反填鴨式學習，要保持開放思維及敢於對傳統作挑戰，目的在於培育「富有同情心及勇敢的年輕女性」。不過由於學校位處市中心，因此不設寄宿，要注意呢。網站：按這裡。

私立第一位：因材施教 培育興趣

St Paul's Girls' School

毫不意外又一次拎第一位，而且去年考試成績驚人，97.1%於A-Level獲A*-B，99.6%於中考獲得A-A*/7-9分，冠絕公、私立學校。位處倫敦西部，學校設有獨有教育方式，將學生分為3階段，每個階段設有不同課程，其中去到第三階段更必須挑選英文之外嘅兩種外語，確保學生起碼通曉3種語言。除學習之外，學校提供極多種課外活動，包括水球、馬術、賽艇、曲棍球、劍擊等，唔少都係普通英國中學未有提供。學校可以話係全國最頂尖學校，有錢都未必有學位，好多學生用咗多達3年時間做準備先可以考得入呢！網站：按這裡。

總結：9成人讀公立

睇完各間學校排名，大家可能都唔知英國公、私立學校有咩分別。公立由政府資助，學費便宜，甚至包埋早餐，好多移民人士嘅子女都可以免費入讀。至於私立，學費當然因校而定，平均嚟計，連寄宿的話每年約15,000至20,000英鎊。英國其實只有7%學生就讀私立學校，因為就算公立學校嘅水平都唔係差太遠，同樣好多學生可以考入著名大學。所以除非真係好想讀私立，都建議大家先向公立入手。