第二任太太癌症逝世 詹瑞文開live感嘆「點解一齊時間咁短」

詹瑞文2012年同劇團同事Amenda（鄭晴予，前名鄭慧蘭）撻著，並且各自結束本身嘅感情關係，備受非議。詹瑞文同Amenda之後結為夫婦，但今年4月傳出Amenda患癌逝世，而詹瑞文就未有回應。到日前，詹sir同徒弟蔣怡Coco開live，分享同Amenda生活嘅點滴。

詹瑞文透露，去年底Amenda發現患癌令佢好震驚，喺摯愛離世前嘅四個月相處時光，詹sir話體驗到愛同希望，即使仍然會悲傷，但依然感恩遇上Amenda。「人生能夠認識到佢，同埋一齊生活嘅十年，可以每一天都過得咁濃烈」。本來詹瑞文仍然可以輕鬆講感受，但之後感嘆「點解我哋一齊時間咁短？可唔可以長啲呢」，終於落淚。

多年來Amenda背負小三之名，詹sir都被指拋棄多年伴侶甄詠蓓同女兒，今次開live詹瑞文都有提到當日嘅抉擇。Amenda 1997年加入詹瑞文同甄詠蓓(Olivia)創立嘅「劇場組合」做行政，詹sir憶述當年Amenda 全力支持佢創作完成夢想，建立起默契之餘，感情上亦決定一齊。而詹瑞文就形容「離婚係人生轉變」，同Olivia關係出現問題，佢選擇「處理面對，停咗呢個關係」。當Amenda被傳媒寫衰，詹瑞文話好想為愛人出聲，但都被對方阻止，Amenda亦會話「我好清楚自己做緊乜嘢」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！