細路，比女人更可怕嘅生物。

頭先見到東鐵有個男人因為個小朋友喊足四個站而忍唔住出手動粗嘅片段，而留言都有好多網友喺度世界大戰到底邊個錯或者錯啲。大蝦細比屎喂大家聽唔小，一個大男人去對一個細路郁手的確點都講唔通。但當一個細路無止境咁利用依點而作惡喺咁蝦你果陣，果種有口罵不得嘅無奈好多人都試過。常言道寧得罪小人莫得罪女人，但計我話就算女人依種魔王級數喺一個細路面前都只喺一隻嘍囉。細路，絕對喺比女人更可怕嘅生物。

好多人覺得女人唔講道理打橫嚟講，但其實女人好多時都係心裡面自知理虧但又唔肯認錯，大部份時間只要男人比個下台階佢落台，件事就可以好完滿咁解決。但喺細路一定唔會同你講道理，因為嘅佢地腦海當中根本就冇道理依樣野。理虧？佢唔知乜野黎，佢只係知道一遇到唔如意嘅事就要扭計，然後好多時就會得到想要嘅嘢。就好似佢要食雪糕但咁啱間嘢部雪糕機壞左，有啲細路可以即刻瞓喺地下邊喊邊大叫「唔制我要食雪糕」。你同佢講雪糕機壞左冇雪糕？佢唔會理你，因為佢唔知雪糕機壞左同食雪糕有咩關係，佢只係知道你比錢個店員之後店員就會拎杯雪糕出嚟。好多家長會同個細路講「喺人都望住你醜死怪啦」，唔好意思，覺得醜果個只係家長你，細路係真正連個醜字都唔識寫嘅生物。佢唔會理喊到口水鼻涕一地都係，唔會理有一大堆人圍觀自己，喺佢心目中果陣除左諗住要食雪糕之外其他嘢都唔重要。直到最後你飛奔去另一間買雪糕比佢，佢會立即變番個笑哂口嘅可愛小孩，而柒嘅從來只有你自己一個。

女人係諗點樣得到自己想要嘅嘢同時都會顧下自己形像，但細路因為冇形像，所以佢地為左得到一樣嘢而做出嘅手段可以更驚奇、兇恨、冇極限。佢地可以喊得比女人多、喊得比女人快、當然仲有喊得比女人得到更多人嘅注意，然後迫使大人為左自己嘅面子而被迫投降。佢地依一秒可以喺一個天真無邪嘅小天使，下一秒又變成人見人憎嘅惡魔，而且有大部份人都唔會怪佢地依個無敵加持，就算一個對住男人再唔講理道嘅女人遇上一個細路都要退避三舍，因為男人喺社會上要讓女人，但真正站喺「社會要讓」最頂端嘅，喺細路。

基本上每個細路都喺咁惡毒，依種喺佢地天生就識嘅嘢，乖果班只係父母識得教，或者知道點樣「鎮壓」住班大帝。但好多唔識教嘅人就會用「細路係曳嫁啦」、「包容下個細啦」、「你唔係同細路計較下話」黎掩飾自己唔識教嘅問題。點解人地個細路五六識已經識禮貌，人地幫佢都知要講唔該，但你個仔八歲都仲一味識喊以為喊就喺一切？唔好賴落細路度，一個細路冇人教唔識嘢喺正常，所以做人父母成唔成功睇個細路教養就最清楚。當你個細路喺車上比人鬧佢喊完未果陣唔好怪一唔體諒自己個仔，麻煩你諗下點解個個家長搭車都冇事，就只有你果一個大魔王特別令人難頂。

一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MaoYanDe
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材，後期加工。