雅虎香港新聞 羅仲謙衰衝動 跳海示愛激楊怡
羅仲謙自嘲長相普通，情路上激情欠奉，初戀更平淡如水，「最激一次」是向太太楊怡跳海示愛，結果當場食檸檬！
謙謙擁42吋胸肌，加上粗眉大眼，相信是不少女生傾慕的典型，不過他形容2004年入行的自己，外貌如卡通人物「蠟筆小新」：「嗰時條一字眉真係嚇死人，依家係靠髮型、運動同包裝啫！求學時係波牛，冇畀女仔倒追，（外貌）完全冇着數，初戀都係拖吓手仔咁咋，冇乜特別。」
直至遇上楊怡，謙謙體內的激情突然爆發，更試過「玩命」示愛：「冬天一個夜晚想畀驚喜佢，跳咗落海向佢示愛，當時以為十拿九穩，點知都係衰咗，不過當時我又冇乜嘢，想向佢展示誠意嘛！仲心諗『又行前咗一步喇！』諗番轉頭未必會再咁衝動，又凍又危險。」
度橋咀張曦雯
他在新劇《木棘証人》夾於張曦雯（Kelly）及張秀文中間，劇情中段「反高潮」交代他獲Kelly「獻媚」，但仍鍾情「超級港女」張秀文！謙謙今次的「艷福」令身邊不少朋友「葡萄」，他笑說：「佢哋追問我同Kelly有冇咀戲，有兩、三場啦！有浪漫有激情，Ending嗰場應該最吸睛，係我主動上網搵資料度橋同監製傾點去拍，效果理想，不過同我以前拍電影嘅親熱戲比較，濕濕碎啦！」
回顧今年成績，謙謙於「疫」市殺出血路，工作從未間斷，令他相當感恩，但對於爭視帝，他再次強調只是說笑，對獎項抱隨緣心態。
