美研究顯示：一拍拖 大腦自動醜化其他異性

正所謂「情人眼裡出西施」，無論另一半高矮肥瘦你都會覺得佢係最好最完美嘅，但點解會係咁？其實可能唔係因為你覺得佢靚咗，而係覺得其他人樣衰咗。

美國一間大學搵咗131位大學生做研究，然後有項功課係會有一個單身嘅異性做拍檔。繼而要佢哋估下11張相入面估吓邊個係新partner個樣。其中5張相係美圖秀秀過，5張就整醜個樣，得1張係原圖。嗱，結果係大部分無拍拖嘅人，會估係執靚咗嗰啲；但有男/女朋友嘅通常會揀咗樣衰啲嗰張。原來就係大腦自動啟動咗Filter，將靚人都變成醜人！

其實靚唔靚，就咁睇係唔覺，無返啲綠葉陪襯又點突顯到呢？所以雖然你個樣好普通，但係你另一半望其他異性嗰陣，自動加咗層醜化layer，個個都變得好似八両金咁嘅。咁樣一比較，你嘅顏值直情拍得住彭于晏啦！

而呢個自動醜化機制，特別發生喺同另一半好好感情嘅人身上。所以成日話甜蜜期嘅情侶打風都打唔甩可能無錯，因為就算有小三進攻，佢都自動以為嗰個係夏蕙BB，點敢有進一步發展呢？

所以愛情真係盲目架，當你好愛好愛佢嗰陣，你眼中只有佢，其他人？咩嚟架？食得架？唔愛嗰陣，佢忽然就變得好平凡，往街裡繞過一周，便化烏有⋯⋯