美麗戰場｜關嘉敏著黑Bra與丁子朗床上纏綿 飾演機心小三獲讚入型入格

因參加ViuTV選秀節目《全民造星III》而彈起嘅關嘉敏（Carman），原本係女子組合Bingo隊長同時又係一名模特兒，雖然20強入10強時止步，但擅長載歌載舞嘅佢仍吸納咗一班支持者。不過較早前關嘉敏宣佈已簽約邵氏，網民直斥佢反骨。近日關嘉敏除咗加盟《愛·回家之開心速遞》飾演尋寶圖秘書洪海迪之外，佢仲喺台慶劇《美麗戰場》中飾演小三圓圓，被網民大讚佢演得入型入格。

《美麗戰場》喺噚晚（17日）劇情除咗講到阿寶（陳瀅飾）與反派琪琪（蔣家旻飾）齊齊入圍香港小姐12強之外，仲有阿進（丁子朗飾）趁空姐女友小美（陳曉華飾）出差，打電話俾小三圓圓叫佢到家中歡愉，正當身穿黑Bra嘅圓圓與阿進喺床上纏綿時，小美諗住俾驚喜男友提早回家，結果捉姦在床，阿進唔單止與小美分手，更怒摑兼趕佢出門口。

其實佢哋嘅三角關係喺早前已經火藥味濃，阿進試過逼不得已帶小美去錄音室，令拎咗糖水去錄音室嘅圓圓與小美碰頭，當時圓圓對小美態度惡劣及公然向阿進放電。喺食糖水時，圓圓唔俾阿進同小美分享糖水，仲咬住湯匙話：「人哋嘅嘢真係特別好味！」，明顯向正印宣戰。

唔少網民睇過關嘉敏嘅演出後，紛紛留言大讚佢演得入型入格，例如「演得好好」、「估唔到妳可以咁奸！做得好好！」、「演得好卡文」、「一出場好有壓台感，真係老土講句，唔做戲嘥左你」、「這種角色很適合她發揮」及「入型入格」 等等。而關嘉敏亦表示自己第一次飾演呢類角色，所以佢事前都做咗好多準備工夫，睇咗成個月「爭鬥系」劇集學做心機女，臨場再靠葉念琛嘅一句說話注下強心針：「呢套劇全套劇都係八婆，你放心去演啦。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！