老婆下令推真人騷直擊吳鎮宇收火教仔

東方新地 - 娛聞

更新日期： 2018年8月18日上午2:25

經常被指躁狂的吳鎮宇，只要對住個仔就乜火都收晒立即變慈父，下個月就滿十歲的兒子Feynman，近年長肉變得圓碌碌超可愛，再次被內地親子騷睇中；不過，自四年前拍《爸爸去哪兒2》兒子撞傷眼角要入院縫針險破相，鎮宇嫂為保護愛兒，已下令推掉真人騷唔畀兒子再捱苦，鎮宇亦樂得做慈父陪兒子放暑假享受家庭樂，日前兩父子鬧市出巡，活潑好動的Feynman跑住去買珍珠奶茶，鎮宇就緊貼身後陪跑，嚴父都被乖仔降服！

撰文：東方新地｜圖片：新傳媒圖片庫、吳鎮宇微博

吳鎮宇訓練阿仔獨立

近日有份主演的電影《逆流大叔》上映，吳鎮宇四出宣傳，早前到奧海城出席活動，太太王麗萍就帶埋九歲兒子Feynman低調捧場。相比14年拍《爸爸去哪兒2》，Feynman身形明顯大不同，昔日清秀輪廓變得圓碌碌好飽滿，睇落相當可愛，原來發育階段的Feynman食量驚人，平日嚴肅cool爆的鎮宇，亦曾幽默笑兒子肥到冇頸似雪人：「佢一個人可以食兩人份量，可以食晒成碟意粉同差唔多成罐午餐肉，打機時佢又縮埋條頸，我諗我要帶佢去睇骨科醫生，將條頸拉番出嚟！」

一直極之重視私隱的吳鎮宇，四年前首度畀兒子萌樣曝光，父子檔參演湖南衛視真人騷《爸爸去哪兒2》，據知情者透露，鎮宇同老婆王麗萍本身非常低調，被打動全因想給兒子留一個珍貴回憶：「咪睇鎮宇好似好嚴好惡，其實佢教仔持開放態度，佢畀好大自由度個仔，唔會迫個仔死讀書，但佢好想訓練個仔快啲獨立，佢成日話，個仔18歲嗰時，佢都快到70歲，怕自己照顧唔到個仔咁耐，所以好想個仔學會獨立，學會面對困難，所以嗰時先肯接拍親子騷;嗰次佢兩父子去咗好多地方拍攝，一齊去體驗同經歷，令佢對個仔性格了解多咗，亦想畀個仔留一個紀念，將來大個可以睇番！」

14年父子檔拍攝《爸爸去哪兒2》，去到尾站新西蘭，一班大人在房開會，小朋友在外邊玩時，五歲兒子Feynman撞落樓梯撞傷左眼角入院縫針，留下永久性創傷，令鎮宇夫婦非常心痛。

拍真人騷出意外

活潑的Feynman，亦因《爸爸2》火速爆紅，轉眼四年，原來近日再有內地親子騷力邀鎮宇父子檔回歸，不過，自從上次拍真人騷出了意外，兒子撞傷眼角受傷，留有永久性疤痕，鎮宇嫂已下令推拍。據知情者透露：「嗰次拍真人騷個仔撞咗落樓梯，撞傷眼角要入醫院縫針，鎮宇同老婆好擔心，雖然個仔最後堅強完成餘下拍攝，但返香港治療，知道係永久性創傷，連視力都有機會受影響，鎮宇真係好心痛，嗰時仲一度搵唔到製作組，冇人肯承擔責任，搞到兩公婆好勞氣，個仔又要捱苦，所以吳太已經講明，以後都唔會畀個仔再拍呢類真人騷！」

體驗自己工作

外表火爆的鎮宇，原來教仔好有心思，更明白身教最重要，除了拍《爸爸去哪兒2》，16年他亦讓兒子客串電影《脫皮爸爸》，還有由他自導自演的電影《費曼的夏天》，更同兒子父子檔做男主角，就是想兒子可體驗他的工作。據知情者透露：「以前鎮宇已經成日帶囝囝去片場，就係想阿仔可以體驗自己嘅工作，了解爸爸更多，原來呢個係佢切身感受，細個嘅時候，因為佢爸爸係點心師傅主管，半夜就會返工，佢同爸爸好少時間溝通，但有一次佢跟咗爸爸返酒樓，了解咗爸爸嘅工作性質同環境，知道爸爸有幾忙碌同辛苦，父子反而拉近咗距離。」

鬧市人盯人

近日兒子放暑假，鎮宇拍戲之外亦爭取時間湊仔，日前兩父子鬧市出巡，著住迷彩衫的鎮宇可能怕畀人認到，戴帽又戴口罩將自己包到冚，兒子則似啱啱做完運動，著住短袖T恤後頸上還攝住毛巾吸汗，兩父子一齊行去買珍珠奶茶，九歲的Feynman非常活潑，淘氣得邊行邊跑，搞到鎮宇亦要從後追住個仔，兩父子人群中追逐場面相當溫馨！