聲夢傳奇2︳嚴選大熱人馬 13歲Sabrina 「翻版Chantel」Jasmine先聲奪人 男仔未見突出

《聲夢傳奇2》上星期六播出第一集，未係正式比賽但已經略見參加者水平。回顧第一輯第一集，炎明熹一開口已經先聲奪人，所以絕對有參考價值！收集網民意見同埋歌唱表現，我地嚴選咗幾位率先跑出嘅參加者︰

趙紫諾（Sabrina）

13歲已經有唱功，仲要唱出歌詞情感，表現穩定兼勝過唔少年長過佢嘅對手。唯一隱憂係唔識中文，而個節目喺翡翠台播，總唔能夠全程唱英文歌。

任暟晴（Jasmine）

被網民稱為翻版Chantel（姚焯菲），咁Jasmine嘅甜美笑容又真係幾似Chantel。但係最厲害係節目入面導師Johnny Yim建議Jasmine 以另一個key同情緒唱呢首歌，Jasmine 當堂有進步。假如呢個轉變唔係預先鋪排的話，吸收力強會係Jasmine 更似Chantel嘅一點。有睇第一輯就知，Chantel比賽初期同後期嘅表現真係爭好遠。

趙小婷（Pamela）

IG有3萬7千人follow嘅街頭busker／youtuber，仲係醫科學生，淨係個package已經夠話題性，第一集表現一般四平八穩但未有驚喜，但係睇好後期表現。而且，呢個背景夠晒正面，應該吸納到唔少客戶垂青，俾我係TVB都留起佢。

黃洛妍(Janees)

一如評審張佳添老師所講，Janees 基本條件有齊，只待雕琢。以近年歌唱競賽節目熱愛「颷高音」嘅玩法，Janees 揀到一首能夠晒冷嘅歌就足以贏人氣。BTW有冇人覺得Janees某啲角度似麥美恩

蕭呈謙(Nicole）

外形有日韓藝人味道，有網友認為佢唱Over The Rainbow唱出歌詞畫面，呢點係幾中。但係選曲難度太高，搵返啲水平易拿掐嘅歌好好演繹的話，十強應該冇問題。

同第一輯《聲夢》一樣，男參賽者明顯被比下去，稍為搶眼嘅可能係唱《黃金時代》嘅金永衡(Christopher）。不過，選秀節目係耐力賽，仲有時間爆發嘅。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！