《聲夢》開騷 緋聞擺上枱 炎明熹壓軸登場「出貓」答謝粉絲

15名「聲夢」學員唱爆麥花臣，為首個演唱會使出渾身解數，「人氣王」炎明熹壓軸現身用實力唱功震懾全場！冼靖峰自爆被導演嫌棄唱歌時樣貌猙獰，與詹天文的緋聞又再次被擺上枱，他笑說是流料，聽到麻木。

一連四場《聲．夢飛行FIRST LIVE ON STAGE》前晚正式開唱，無綫主席許濤、副總經理曾志偉、高層樂易玲、星夢老闆何麗全、應屆候選港姐均現身支持。首場嘉賓有節目主持森美、導師JW及泳兒，甫開騷全體學員穿上MV造型逐一出場。

鍾柔美開庭公審

冼靖峰（Archie）跟何晉樂合唱完玩互相「廝殺」，前者自爆覺得被導演討厭︰「佢話我哋唱歌個樣好猙獰同醜樣。」後者認同並笑說好佩服對方唱歌時鼻窿大過口，更有圖有真相，Archie急解釋只是角度問題。詹天文（Windy）及文凱婷（Aeren）曾分別跟Archie及「火雞」孫漢霖傳緋聞，鍾柔美抵死再重提「公審」，Aeren撲出叫收聲：「緋聞即係假㗎啦！唔係真！」

姚焯菲獻唱「成名曲」《戀愛預告》時獲全場Fans拍手歡呼，炎明熹（Gigi）大騷長腿壓軸出場跳唱，不擅講話的她醒目上網搵「軍師」準備致謝信答謝Fans，騷後她自爆出場前緊張到抖不到氣，Archie即大讚她表演得好好給予信心。對於跟Windy的緋聞再次成話題，他指並不介意：「冇乜所謂，係稿嚟嘅，綵排嗰陣講過好多次，聽到冇感覺，係假㗎！」