肥仔@光頭幫TomFatKi宣布退出 疏離原因矛頭直指肥蛙 福正寫千字文護花並爆成員曾「叫雞」

香港獨立饒舌歌手組合「光頭幫TomFatKi」由肥仔、福正、阿奇組成，其後不斷加入新成員，佢哋憑《天水圍Gang Gang》一曲而大受歡迎，上年仲喺旺角麥花臣開騷。最近幾個月佢哋冇出新片，有唔少粉絲都覺得奇怪，更有網民懷疑佢哋出現不和情況。噚日（4日），成員Lai Tai肥仔喺IG出PO宣布退出，並將矛頭指向福正女友肥蛙，認為佢就係令成員關係疏離嘅原因，其後福正不忍女友受網民攻擊，於是寫千字文護花，並大爆有成員曾「叫雞」。

噚日肥仔上載成員合照，並PO出一篇千字文宣布退出，而當中嘅原因就係同福正有關。首先佢就講到自己同福正喺中學認識，係佢最好嘅朋友，當時佢哋好開心，成日一齊玩一齊諗橋，之後有埋阿奇，後期再有陸續將團隊擴大。不過自從疫情期間，福正同YouTuber肥蛙拍拖，肥蛙俾咗好多意見同想法，但好難將佢嘅方法複製去團隊度。佢知道福正除咗係TFK成員，同時亦係人哋嘅男朋友，所以佢同阿奇選擇迴避同沉默。

時間越嚟越耐，各人嘅核心思想唔同咗，以前成班人一齊四出做嘢工作演出好開心，但係福正就覺得成員多係壞事，因為一大班人會分薄利潤。 去到今年年頭，肥仔諗住大家可以趁住去日本旅行修補關係，因為佢哋講咗好多真心說話，不過可惜返到香港就打回原形，令佢深受打擊，同時佢屋企亦發生咗一啲事，所以處理唔到咁多嘢。

肥仔續指導致佢哋唔可以再繼續玩落去嘅原因：「原來有自己人一直容許女朋友登入佢既WhatsApp. 一直監視住我地個group同其他對話」，而佢哋係唔知情，同感覺被嚴重侵犯私隱；而佢哋發現咗之後就唔夠膽再繼續溝通，同埋就算見面溝通都竟然要錄音，搞到肥仔勁嬲。去到最後，肥仔就表示心痛TFK唔可以繼續行落去：「TFK無辦法再行落去我好心痛，好唔開心，收埋左自己一段時間，今次應該係我打得最多字既一次，我都唔想搞到咁，但我更唔想再繼續咁，對唔住各位，希望大家體諒」。

福正不忍女友受網民攻擊，於是寫千字文護花，仲爆出成員曾召妓。福正喺文中第一句就表示好對唔住女朋友肥蛙，因為去到呢一刻女朋友都係保護緊佢哋三個，並冇將佢哋「叫雞」嘅事公開。福正表示女友從來都冇干涉佢喺TFK上嘅任何決定，而肥蛙亦冇強迫佢提供任何對話俾佢睇。至於睇WhatsApp對話嘅事，福正就話係自己冇喺女朋友電腦登出，所以唔關佢事。至於錄音事件，福正就話要講就講事實嘅全部，因為當時有人威脅佢，所以錄音嘅目的係保障佢，但係就從來都冇錄影。福正再話過去半年試過用唔同嘅方式溝通，不過換嚟嘅只有「以讀不回」。

福正表示佢想改變嘅原因只係想佢哋三個好，而佢亦希望佢哋有自己作品嘅主導權，而唔係喺創作時被拒絕，或要人批准佢哋做啲咩作品。去到利潤分薄方面，佢係尋求嘅係「公平」及「公道」，所以佢只係想保障佢哋三個人嘅利益，及維持TFK財政健康，營運正常。福正最後講到真正原因係拒絕溝通。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！