肥媽8月英國慈善騷延期至明年 最低票價港幣$1680 貴過睇張敬軒

今年張敬軒、周國賢、黃耀明、樂隊ToNick 及RubberBand等香港音樂單位去到英國開show，而早前英國華人資料及諮詢中心(CIAC)亦宣布邀請肥媽Maria Cordero，於8月中到英國演出2場慈善音樂會及參與一場慈善晚宴。不過CIAC日前宣布活動延期至明年，但未有交代原因。CIAC只提及延期安排獲得肥媽同意，並會繼續支持機構嘅籌款活動，而已售出嘅門票將獲全額退款。

而肥媽嘅社交平台，由英國演出展開宣傳到取消，都未有發文宣傳；肥媽亦暫時未有透露活動延期原因。根據早前公布嘅資料，2場音樂會喺倫敦市中心西敏寺區嘅Central Hall Westminster舉行，場地最多可容納2300個觀眾。而演唱會票價分別為£328、£268、£228及£168，以近期1英鎊兌＄10港元匯率計，睇肥媽最低消費要港幣＄1680，最貴飛更加要＄3280，價位比今年初張敬軒英國演唱會嘅票價更高！而慈善晚宴票價更高達£428（港元＄4280）。

而大會海報就印有特區政府向海外地區宣傳香港品牌嘅「你好，香港」標誌，並獲香港經貿辦支持。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！