肥美人︳豐滿版《全民造星》 朱朱 Cherry跳舞有驚喜 呢位評審個妝重手咗

ViuTV新節目《肥美人》尋晚首播，以往Viu都做過《造美人》同《口罩小姐》呢類非一般選美，今次《肥美人》據講有400人報名，大會選出29個參加者進入初賽，第一回合以個人表演爭取入圍。第一集睇落去成個玩法似《全民造星》，參加者自我介紹完再播演出片段，但係節奏比《造星》明快得多，一集已經出咗8個item。

同《造星1》一樣，《肥美人》都有網友投票保送晉級環節，結果由12號嘅刑洋陽（洋腸）得到最多票數入圍。

至於表演水準就有啲參差，跳舞嘅多數有睇頭，一啲都唔論盡，反而唱歌嘅就唔到key，聽得好尷尬。第一集出場參加者當中，21歲嘅「殭屍牙」朱朱算係較為矚目，因為佢跳唱As One嘅Candy Ball，而主持之一陳葦璇正正係當年As One成員之一，節目仲安排陳葦璇同朱朱即場battle，朱朱居然不落下風搶鏡成功，但係只得10分，要晉級可能危危乎。

另一位跳肚皮舞嘅Cherry勝在夠親和力夠投入，亦大方展示震震肚皮，獲得評判小儀欣賞，最終得到21分，應該出線在望。

表演唱歌嘅大咪原來10年前曾經參與TVB《超級巨聲》，但係30強止步。後來佢結婚生仔，仲自己創業兼讀埋大學，因此想轟轟烈烈圓夢。可惜歌聲未夠水準，只得8分，好大機會出局。

參加者以外，網友亦都討論評審之一嘅何超儀，久未露面嘅何超似乎錄影當日個妝重手咗，隔住個mon都睇到個鼻影好深色。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！