胡鴻鈞差錯腳骨裂:少用下半身

東方日報
·2 分鐘文章
胡鴻鈞紮住痛腳,現身新劇拜神儀式。
胡鴻鈞紮住痛腳,現身新劇拜神儀式。

藝人胡鴻鈞拍劇再次受傷,昨日「三隻腳」亮相拜神活動,並語帶雙關,打趣指近日「少用下半身」。而講波講到黑眼圈盡現的余德丞則強調「身壯力健」,並宣布稍後會全面「復出劇壇」。

胡鴻鈞、何依婷、羅天宇、余德丞等昨午於電視城出席新劇《十月初五的月光》拜神。胡鴻鈞撐拐杖現身,原來日前拍外景時發生小意外:「嗰日條街好黑,我踩咗落水氹聽到『啪』一聲,工作人員幫我搵冰敷,最終要去醫院,證實骨裂。醫生叫我休息多啲,依家拍文戲先,只用上半身演戲,下半身少用,但我係好腰好腎好男人。」身旁的何依婷即搭嘴表示:「唔知佢下半身有冇用喎!(安慰佢?)我不停問佢情況,問足幾粒鐘,搞到佢話我煩!」胡鴻鈞解釋:「佢係驚我影響啲通告同佢開工啫!對唔住,我會快啲好番。」忙拍劇之外,他亦同時推出新歌MV,以破格造型亮相。

而於劇中客串演出的余德丞,早前被發現講波時疲態畢露,他強調身體無大礙:「同公司溝通過,想開始拍番劇喇,今次熱吓身先。大家唔使作無謂嘅揣測,嗰場係澳洲球賽,花啲時間做資料搜集,所以先瞓唔夠,加上現場燈光、化妝影響,先影到我個樣好攰。」他續指從小患有哮喘,因血液長期不夠流通,令黑眼圈加深:「其實我非常健康,仲會去跑步添!」

Bella伍富橋「復合」

至於林穎彤(Bella)與伍富橋月前「分手」兼互相取消關注社交網,卻被安排於《十》劇演情侶,伍富橋說:「劇情交代我傷害佢,所以唔想咁快抽離角色,打算拍完套劇,擇個吉日,先再follow佢。」Bella即笑說:「其實佢有偷偷咁睇我啲嘢。(有機會再做『好朋友』?)畀啲時間我哋,重新了解吓先。」

化了妝亮相的余德丞,精神番晒!
化了妝亮相的余德丞,精神番晒!
「已分手」的Bella與伍富橋飾演情侶,夠晒話題。
「已分手」的Bella與伍富橋飾演情侶,夠晒話題。