胡鴻鈞窒頭窒勢 何依婷被恰慣 搵初哥哥報仇

東方日報
·1 分鐘文章
何依婷演「君好」,造型夠晒純情。
何依婷演「君好」,造型夠晒純情。

新一代「文初」、「君好」將會由胡鴻鈞、何依婷擔演,二人日前試造型,首次擔演女主角的依婷坦言有少許緊張,更指平時對方經常欺負她,不過劇中她卻可以名正言順向「初哥哥」有仇報仇。

藝人胡鴻鈞(Hubert)、何依婷(Regina)日前於電視城為無綫重拍的經典劇《十月初五的月光》試造型,兩人分別飾演文初與君好,Regina之前曾為Hubert擔任MV女主角,但合作拍劇則是首次。他們接受無綫新聞台訪問時,Regina笑言:「佢成日窒我,但同劇中角色啱啱相反,劇入面佢成日要畀我蝦,我可以報仇。」

壓力化為動力

而兩位主角日前接受本報訪問,Regina謂:「我同胡鴻鈞拍過MV,跟住又拍過《降魔的》真人騷。(做緊準備工夫?)都有呀!我學緊手語同睇劇本,希望可以做好啲!其實學手語都幾得意同好玩,Hubert好犀利,佢係要記得最多嗰個,今次第一次做女主角當然有少少緊張,但又未至於會好大壓力,因為係一件開心事,要將壓力變成推動力,推動自己做好角色,希望可以表現得更加好。」

享受學習手語

至於Hubert笑言自己並非語言白癡,學手語亦很快上手,相當享受過程,他謂:「原來手語同日常生活中好多事物都息息相關,你係會明白點解啲動作會咁做,好多動作都估到係咩意思。」

何依婷與胡鴻鈞重演經典劇,將壓力化為動力,希望演好角色。
何依婷與胡鴻鈞重演經典劇,將壓力化為動力,希望演好角色。
首次擔正主角的何依婷,講明要加演一幕「公主復仇記」。
首次擔正主角的何依婷,講明要加演一幕「公主復仇記」。