胡鴻鈞自知之明 同前輩冇得比 何依婷志在學嘢 封后太遙遠

·2 分鐘文章
何依婷憑着標青外形脫穎而出,不過講到攞獎就未係時候。
何依婷憑着標青外形脫穎而出,不過講到攞獎就未係時候。

胡鴻鈞昨日出席新劇宣傳,直言不怕外界把他們與經典劇集比較,因自知與張智霖冇得比!首次擔正做女主角的何依婷則沒想衝擊視后,坦言太遙遠。

藝人胡鴻鈞(Hubert)、何依婷、羅天宇、林穎彤、蔚雨芯、米雪等,昨日到將軍澳電視城出席劇集《十月初五的月光》宣傳活動,正值海俊傑及石修生日,眾人於台上為兩位壽星驚喜慶生。講到劇集即將出街,首次擔正做女主角的依婷表示開心又期待,問到可擔心外界將他們與張智霖及佘詩曼的舊版本比較?她說:「我冇諗咁多,如果要比較都冇辦法阻止,但呢個係20年後再拍,劇情都有唔同,希望將經典帶畀年輕一代。」

頒獎禮當去派對

Hubert就直言不怕比較:「呢個係經典劇集,但戥依婷開心,大家讚佢外表甜美,但對我就好壞參半,話同張智霖冇得比,我自己都覺嘅。(唔開心?)冇呀,我都有自知之明,不過希望大家感受到我都花心機、時間演繹,畀角色新生命。」問到他們可有信心衝擊視帝視后?依婷說:「呢個好遙遠,冇諗咁多,希望可以睇番自己有咩要進步嘅地方,我就睇好李佳芯或者林夏薇。」Hubert就笑言:「我話要衝擊視后㗎嘛!」依婷即改口謂今年睇好對方攞視后,隨後Hubert表示對於影視獎項僅抱參加party的心態。

林穎彤拒絕翻撻

同場的林穎彤自媽媽被爆「叫鴨」後首次見人,她坦言現時與媽媽心情OK,事件交由警方處理,不方便講太多詳情,對方亦沒再騷擾她們,總算放下心頭大石。講到劇中與前度伍富橋演情侶,她表示沒有尷尬:「因為之前都有一齊合作做嘢,反而熟啲仲好。(會唔會翻撻?)正如我頭先台上對白所講,『我係唔會翻啅你㗎』,現實我哋係好同事。(冇機會?)可以繼續做好朋友,之前媽咪件事佢都有慰問我。」

羅天宇(右起)、何依婷和胡鴻鈞在劇中發展出一段三角關係。
羅天宇(右起)、何依婷和胡鴻鈞在劇中發展出一段三角關係。
林穎彤的心情未有受母親鬧出的風波所影響。
林穎彤的心情未有受母親鬧出的風波所影響。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能