與偶像合作淆底 朱晨麗為家輝失眠 蔣祖曼探班追星

朱晨麗(左)與蔣祖曼整心心有默契。
朱晨麗(左)與蔣祖曼整心心有默契。

朱晨麗今日便會開工與影帝張家輝拍攝新片,她直言未見到偶像已心跳加速,緊張到瞓唔着;蔣祖曼聞言即表示一定要去探「美斯」班,大讚家輝靚仔。

蔣祖曼、朱晨麗、鄭俊弘、龔慈恩與楊卓娜等,昨日在荃灣宣傳無綫劇集《輕.功》結局篇,朱晨麗大感不捨,指大家相處了一段時間,感覺像家人,想起也想喊。蔣祖曼透露已相約一班演員星期五一齊食飯睇大結局,可惜黎耀祥最終趕不及回港宣傳,希望他盡快回來請食飯。

朱晨麗今日便會為張家輝自編自導自演的電影《贖夢》開工,身為小Fans的她坦言緊張到失眠:「一嚟佢係影帝,同埋係我偶像,好耐冇試過咁緊張,未見到偶像已經心跳加速,又擔心演得唔好,會把握機會偷師。」蔣祖曼即笑言要去探「美斯」班:「欣賞咗張家輝好耐,『化骨龍』時期已經鍾意佢,佢有演技、外貌、才華同味道,你哋唔覺得佢好靚仔咩?」

鄭俊弘追B抖抖先

鄭俊弘透露太太何雁詩帶同兒子前來捧場,笑說:「因為呢度街市好出名,所以老婆專登過嚟買餸,都想帶個仔出街行吓。」他指囝囝7個月大,剛開始坐得穩,已準備好拜年𢭃利是服裝。問會否追個兔B?他說:「都想生多個,太太亦有準備,但見佢佗B、湊小朋友好辛苦,可能想休息吓,做一陣嘢先再生。」

另外,無綫公布上周節目收視,適逢聖誕及新年長假期,翡翠台黃金時段收視全線上升,當中《東張西望》跨平台直播收視最高25.2點,繼續高踞榜首;處境劇《愛.回家之開心速遞》最高收視23.1點,上周首播的劇集《有種好男人》最高收視22.6點,而《輕.功》最高收視亦有19.8點。

鄭俊弘Fans帶同應援物品捧場。
鄭俊弘Fans帶同應援物品捧場。