與內地女子行街睇戲斷正 羅莽承認覓得第二春

喺娛樂圈打滾幾十年嘅資深演員羅莽，大家除咗知佢好「打」得之外，同時亦都知道佢好長情。佢喺1979年同任職診所護士嘅老婆結婚，其後誕下兩名子女，不過喺1989年老婆因血癌逝世，至今一直未有再娶。今日就有報道指羅莽滿面春風咁與一位內地中年女子行街睇戲。

報道指65歲嘅羅莽身材仍然保持得好好，當日佢同一位目測年過40嘅女子行街睇戲。呢位女子雖然打扮，不過企喺羅莽身邊都幾登對。佢哋喺行街期間冇親密嘅舉動，不過羅莽就一直笑住講唔停，而女方就微笑同聆聽，睇落相處融洽。

被傳媒問及戀情嘅時候，羅莽承認與相差20年嘅內地女子嘅戀情，仲話2011年嘅時候大家兩情相悅，至今拍拖已經8年，期間相當開心，仲已經發展至同居關係。至於會唔會結婚，羅莽就話年代唔同咗，大家開心就得，不過唔排除將來會考慮。

原名羅坤霖嘅羅莽，喺13歲開始習武學南派東江朱家螳螂拳。18歲喺電影公司做信差嘅時候，得到導演張徹賞識，其後加盟邵氏武術訓練班。佢喺邵氏拍攝過多套武打片，當中包括《少林寺》、《五毒》、《金臂童》及《少林與武當》等等。喺80年開始，羅莽由電影界轉戰電視界，不過星運平平，都係飾演配角居多。雖然喺唔少香港人眼中，羅莽只係一位甘草演員，其實佢係外國有唔少忠實嘅粉絲。喺2007年，羅莽獲得美國 Phillywood Entertainment 第一屆「國際武術影業終身成就獎」。2016年喺美國舉辦粉絲聚會，聚會超過百位粉絲出席。