荃灣新開健康主題海景多國菜！自選三菜一湯午市定食+必食牛油果溫泉蛋

近年唔少人都食得健康，不過出外食飯其實都唔多選擇～荃灣最近就新開一間健康主題多國菜，以木系及白色為主調，擺放咗唔同綠色植物作點綴，環境寫意舒適，餐廳設有數十個戶外座位，室內食客都可以透過大玻璃窗欣賞海景，好Chill呀～食物方面都幾多元化，午市主打三菜一湯自選定食，另外招牌仲有超吸睛嘅Salad bowl同慢煮菜式！

自選午市定食($78)

招牌自選午市定食，可以自選兩款頭盤+一款主菜+白飯或胡麻烏冬+指定餐湯及飲品，大廚就話因為想迎合唔同口味客人，所以就供應中、西及日式嘅選擇，如主菜有鹽燒鯖魚、吉烈蠔、慢煮燴牛面頰及香草蜂蜜一字骨等。而前菜都幾有誠意，如和風吞拿魚蛋卷、菠蘿雞肉沙律等。

Love strawberry ($138)

視覺效果好吸引嘅紅色沙律碗！加入士多啤梨、新鮮無花果、藍莓、紅菜頭及雜菜等，醬汁酸酸甜甜，味道清新，啱晒想健康又要食得飽肚嘅女士們。另外仲有Superfood Salad都值得推介，就有牛油果、藜麥、杞籽及三文魚等營養豐富食材，食完即刻精力充沛！

牛油果溫泉蛋($88)

有咩吸引得過流心溫泉蛋呢？呢味牛油果溫泉蛋係傳統蘇格蘭蛋嘅健康版，用牛油果取替肉類，外層由牛油果醬混合果仁及椰絲製成，不經油炸亦做到香脆口感。

火炙慢煮三文魚($238)

一系列嘅慢煮菜式亦係餐廳招牌菜，先將三文魚用日本豉油、味醂、薑及蒜醃製，再用48度水浸35分鐘，三文魚內部仍然未完熟，口感嫩滑，味道甜甜鹹鹹都好開胃。

香煎西班牙豬鞍($268)

而西班牙豬鞍同樣都係醃製後，用63度水浸25分鐘，再用牛油及胡椒煎香鎖住肉汁，一切開內部呈微微粉紅色。

傳統焗田螺($138)

Peko Peko Eatery
地址: 荃灣大河道100號海之戀商場1樓1006-1007號舖