【女大十八變】《On Call 36小時II》莊錠欣進軍韓國 翻唱IU歌曲獲網民大讚：好聽過原唱

近排無綫深夜時段重播《On Call 36小時II》，唔經唔覺套劇已經係7年前, 當年劇中個個女星都非常吸睛，例如有女神朱千雪、岑麗香、王君馨及楊怡等。除咗佢哋之外，仲有劇中飾演吳啟華個女「Yannis」嘅莊錠欣（Elkie）都好值得留意。莊錠欣拍呢套劇嗰陣只有15歲，當時要飾演一個任性刁蠻女都唔易，當時已經得到馬國明讚佢勤力有天份。

除咗《On Call 36小時II》，年紀輕輕仲喺無綫拍過唔少劇集，例如《老表，你好hea！》、《好心作怪》、《公主嫁到》、《不速之約》及《張保仔》等等，不過最為人記得應該係佢喺《老表，你好hea！》中飾演少女版萬綺雯。另外，佢曾經擔任過兒童節目主持同家燕媽媽藝術中心旗下少女組合Honey Bees嘅成員。之後，莊錠欣就去咗韓國出道，而家已經係韓團人氣女團CLC成員之一。喺前年，佢仲拍攝韓劇《富家之子》，成為首位拍韓劇嘅港人韓星，當時唔少人仲大讚佢演技自然。雖然Elkie喺韓國發展，唔係成日返香港，但佢都會同本地藝人聯絡，好似喺今個農曆新年佢就約咗朱千雪見面。

日前Elkie公司喺影音網站嘅官方頻道發布佢翻唱IU嘅《I Give You My Heart》，有網民聽完就覺得Elkie比IU唱得更甜美同有感情，唔知Elkie幾時會唱返啲廣東歌回饋一下香港嘅粉絲呢?