萬千星輝頒獎典禮2023｜視后競爭激烈 佘詩曼大熱入十強 有冇機會三度封后？

《萬千星輝頒獎典禮2023》將於2024年1月14日舉行，提名名單出爐後觀眾熱烈投票，各個獎項嘅最後十強名單亦已經喺噚日（20日）出爐！劇集《新聞女王》及《破毒強人》喺多個獎項中獲得超過一個提名，氣勢強勁！唔知大家嘅心水有冇入圍10強呢？

【Yahoo民意調查】TVB 萬千星輝頒獎典禮2023｜票選你心目中的視帝、視后！

相信大家最關心嘅一定係視帝視后嘅10強入圍名單，唔少大熱人選都成功入圍，最佳女主角10強方面，就有《有種好男人》李佳芯、《隱形戰隊》劉佩玥、《靈戲逼人》龔嘉欣、《破毒強人》胡定欣、《寵愛Pet Pet》林夏薇、《你好，我的大夫》蔡思貝、《香港人在北京》吳若希、羅密歐與祝英台》陳茵媺、《新聞女王》佘詩曼及《新聞女王》李施嬅，今屆嘅大熱視后人選就係喺《新聞女王》佘詩曼及《新聞女王》李施嬅。今年視后寶座競爭可以話係相當激烈，有人隨時3度封后，亦有人有機會首奪視后，大家拭目以待喇！另外，周秀娜爆冷被Foul及已經離巢嘅黃智雯及唐詩詠同樣出局未能躋身十強。

唔少網民紛紛留言支持自己嘅心水視后，例如「一路睇頭幾個女角，覺得有啲都幾唔錯，但直至到尾二出現的阿佘，嗰種氣場真剎！冇得輸」、「支持佘詩曼得視后」、「佘詩曼眼神眉毛都識做戲 贏晒幾條街」、「冇辦法，阿佘太霸氣，其他人下年加油」、「Man姐必勝」、「支持新聞女王李施嬅！」、「雙視后，阿佘及李施嬅」、「龔嘉欣，唔該」及「Ali is the best」等等。

睇返過去26屆最佳女主角，有4位女星試過兩度封后，分別係汪明荃（2001年《婚前昏後》及2005《我的野蠻奶奶》）、鄧萃雯（2009年《巾幗梟雄》及2010年《巾幗梟雄之義海豪情》）、佘詩曼（2006年《鳳凰四重奏》及2014年《使徒行者》）及胡定欣（2015年《鬼同你OT》及2016年《城寨英雄》）。而最年輕及最年長得主分別係蔡少芬以25歲之齡喺1998年憑《天地豪情》及2019年憑《鐵探》榮升視后嘅59歲惠英紅。

至於最佳男主角方面，10強包括《愛·回家之開心速遞》單立文、《隱形戰隊》陳山聰、《靈戲逼人》張振朗、《破毒強人》陳豪、《破毒強人》蕭正楠、《寵愛Pet Pet》周嘉洛、《你好，我的大夫》何廣沛、《香港人在北京》陳展鵬、《疊影狙擊》黃宗澤及《新聞女王》馬國明。今年視帝競爭同樣激烈，當中以《破毒強人》陳豪及《新聞女王》馬國明嘅呼聲最高。

【Yahoo民意調查】TVB 萬千星輝頒獎典禮2023｜票選你心目中的視帝、視后！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！