落選港姐郭珮文有份拍《法證先鋒6》演黃宗澤下屬 得寵程度勝冠軍莊子璇

今屆落選港姐郭珮文（Juliana）於《2023香港小姐競選》中五強止步，但原來已被TVB睇中，參選完未夠2個月已獲安排入《法證先鋒6 倖存者的救贖》劇組，不但係應屆港姐之中最快拍劇嗰個，更加與黃宗澤、袁偉豪、蔡潔、蔣祖曼等人合作，睇嚟得寵程度更勝港姐冠軍莊子璇。

郭珮文前日（25日）以一頭黑髮新造型搭配印有劇名的T-Shirt及黑色長褲出席《法證先鋒6 倖存者的救贖》開鏡拜神儀式，雖然著得密實，但仍難掩豐滿上圍。郭珮文除咗為新劇將金髮染黑，仲剪短咗頭髮，原來佢將飾演黃宗澤嘅法證人員下屬，笑言當初收到通知叫佢參與拍攝時，以為佢哋搵自己演死屍。對於咁快有得拍劇，郭珮文表示好榮幸又緊張，聽到好多身邊嘅人都話選完之後要等幾年先有劇拍，所以好感激公司畀呢個機會佢，會趁拍攝時向唔同崗位嘅劇組人員學習；郭珮文亦透露今次於劇中以行政人員形象及西裝外套造型現身，唔會性感。

其實郭珮文會率先彈起早已有跡可尋；郭珮文參選香港小姐競選時已因一頭金髮、好身材及真性情成為大熱，於終極面試中就連曾志偉都大讚：「我都唔記得睇面形，行出嚟我只係睇到57號。」即使郭珮文面對陸浩明提問表現得口啞啞，但曾志偉仍笑到見牙唔見眼，睇嚟相當滿意郭珮文。加上，2023香港小姐結果出爐後，冠軍莊子璇及亞軍王怡然先後被爆出醜聞，前者被指與佳麗不和兼雙面人，又被傳係福建社團聯會骨幹成員；後者王怡然則被爆父母於內地挾過千萬走佬，以及流出曾用普通話鬧爆侍應嘅影片，形象大跌。至於，季軍王敏慈就因為正於北京讀書須兩邊走，應該暫時無瑕分身拍劇，故此形象正面嘅郭珮文上位絕對唔係無道理。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！