葉童內地機場拒絕合照被咆哮 涉事油膩中佬拍片道歉 ｜有片

兩奪香港電影金像獎嘅61歲女星葉童，90年代憑多套古裝劇走紅兩岸，近年葉童喺內地工作居多。前日內地網上流傳一條影片，身在杭州機場嘅葉童為影迷簽名，有位中年男子要求合照但被葉童助手拒絕。呢位中佬當場爆seed大罵「拍個照不行啊，有啥了不起？」，令到葉童嚇一嚇。

影片被廣傳之後，葉童喺微博發文寫道「每個人表達喜歡的方式不同，感受到了大家的熱情，只是機場對我來說不是最佳互動的地方」、「愛是克制，建議大家在表達喜愛時更多些理性和冷靜，互聯網上看到的只是片面，也請大家對每個人都多一點善意和包容」，打圓場之餘亦避免有心人搞事。

而喺小紅書，有位中佬拍咗3條片，向葉童及其助理同埋其他粉絲道歉，承認自己就係當時大罵葉童嘅人，喺影片中佢向葉童道歉，表示當時說話不冷靜，佢會深刻反省。其中一條片嘅畫面所見，呢位大叔條頸出晒汗，可能好緊張。由於大叔拍片時其中一套造型有東北服飾七彩大花圖案，有網民叫佢交代自己來自邊度，免得令東北人被誤會，亦有網民質疑呢個大叔係故意搞事賺流量！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！