葛民輝名下潮店漏水 樓下內衣工場損失30萬求償被拒 受害租戶指責「無誠信」

商台出身嘅葛民輝（阿葛）除咗幕前工作之外，亦係潮流品牌主理人，多年來都喺觀塘工廈開潮鋪兼工作室，仲不時同外國潮牌合作。最近有傳媒報導，葛民輝同拍檔蔡一智經營嘅工作室，因為光刻機著火而導致灑水系統啟動，結果出現嚴重滲水，令到樓下一間內衣工場受波及，車衣工具及內衣製成品等被浸濕受損。但係內衣工場負責人指，佢地想搵公證行判斷滲水原由，但公司負責人、亦即阿葛家姐Lorraine多次拖延，甚至發信話毋須負責，令內衣工場嘅職員相當不滿，批評阿葛公司冇誠信。

滲水事件喺5月中發生，報導引述工廈業主發出嘅信件，指當晚阿葛工作室嘅職員晚上10點收工後，工作室內嘅光刻機疑因電力問題而引發小火，並啟動灑水系統。阿葛嘅同事深夜返工作室善後至第二朝7點，但大廈管理處直到內衣工場早上9點半求助先知悉事件。信中直指阿葛工作室明顯疏忽，需要負責。

至於內衣工場負責人陳小姐就話，當日早上返到公司發現一地都係水，於是向管理處報告，而阿葛工作室嘅一位葛小姐（即阿葛家姐Lorraine）同同事嗰朝去到內衣工場了解，並且道歉，同日下午仲送上水果同零食以表歉意。

後來內衣工場點算過後，估計損失約30萬元，但向阿葛家姐Lorraine提交索償詳情之後，Lorraine就態度轉變，聲稱索償額太大負擔唔到，而且多次推搪唔肯俾內衣工場搵嘅公證行上門視察。後來Lorraine一方甚至自行發信，向內衣工場聲稱事件係意外，毋須負責。

內衣工場負責人批評阿葛工作室唔肯負責，而且好多做好嘅內衣要報銷，令到工人要趕工，加上有唔少手尾跟，相當麻煩。傳媒向Lorraine了解事件，Lorraine承認工作室發生過小火，但對於送生果之舉就話只係禮貌。

傳媒發現阿葛工作室係由葛民輝同蔡一智出任公司董事，Lorraine擔任秘書，但工作室就以阿葛老婆Mini名下公司向工廈登記。