葡萄友：話請Fans食飯講得出做得到 周董紅得有道理

周董周杰倫而家就係紅館開緊「地表最強」演唱會，今次嘅演唱會都幾多互動嘅元素，例如有同fans即時合唱同即時影相嘅環節，前日仲有同何超蓮合唱一咗一段添。而係前晚嘅互動環節中周董揀中一位fans，個個fans就話16年嚟一直追嘅唔係星（周杰倫），而係追一種精神。聽到呢句後身為天王級嘅周董好感動話完show後要請佢食飯，好多時聽到呢啲說話都會覺得同得閒飲茶一樣─得個講字，而最估唔到係周董講得出真係做得到，仲係Facebook到放咗張同fans食野嘅相，果然係「找數真漢子」，令到其他fans好羡慕同葡萄之餘亦都更加死忠。

明星或者藝人其實有好多，但唔係個個都受歡迎、紅得起，仲要能夠紅足咁多年嘅真係寥寥可數，或者佢地至少要具備呢幾個條件先有機會：

真材實料

作為藝人當然要有才藝先至有賣點，可以係唱得、跳得、識多種樂器、有演技甚至係有知性嘅內涵等等。如果下下都靠性感賣肉，大把人都可以，睇得多仲會覺得悶添。

真心對粉絲好

其實fans係明星藝人嘅衣食父母、米飯班主，無人睇無人鍾意嘅根本就無價值，但有唔少藝人出咗名後就唔識人或者係人前人後兩副咀臉，最後都係倒令人討厭。好似周董就試過等fans返屋企拎平板同佢影相、幫手放下狗，真係未必個個都願意咁做。

個人風格

藝人除咗要有才仲要有個人風格，做到難以被取代而且夠特別同吸引先可以留得住一班fans。例如黎明嘅金句、Juno嘅另類等等，都令人覺得有種魅力。

觀眾緣

觀眾緣雖然係比較一個抽象嘅詞語，但當你喺電視或網上見到一個藝人覺得順唔順眼、把聲會唔會好難頂等等就係觀眾緣嘅部份因素。除此之外，當然仲有佢嘅言行舉止啦，好似成日亂講嘢或者偷食唔專一，自然會被人唾棄。

相片來源：周杰倫 Jay Chou＠facebook