葡萄友：重遇舊愛唔一定老尷 4個令人冰釋前嫌的原因

鄭中基暴龍哥啱啱完成咗一共四場係紅館嘅「Play It Again」巡迴演唱會，同歌迷一齊度過農曆年。演唱會請咗唔少嘉賓包括杜汶澤、梁詠琪、薜凱琪以及最令人注目嘅舊愛楊千嬅。自4年前係香港電影金像奬碰頭後，2人終於再係台上重遇合唱咗《製造浪漫》同《閉目入神》兩首歌，期間Ronald答謝千嬅新年都出席，而千嬅則笑住問佢咁大張人情卡點樣還，令一向好多野講嘅Ronald都口窒窒，最後兩人握手兼嚟個擁抱，掌聲如雷而且觀眾都睇得相當開心。

唔少愛人情人係分開之後都難免會顯得尷尬，甚至最後因愛不成而成恨，導致反目成仇，其實轉變一下心態，相信會更加正面。

再見亦是朋友
再見亦是朋友並唔係人人都能夠做得到，因為曾經最親近嘅忽然間要同佢保持距離，難免會好唔習慣，但當大家都可以做番朋友時就代表已經放得低，無嘢再糾結。

令人成長
不論一段關係最後有無成果，都係一次學習嘅過程，就好似99年千嬅同鄭中基分手，當時佢就回應話仲會關心對方，仲「令我學識且人相處，咁先會長大」。

各有所屬
剛分別嘅時候可能真係會尷尬同唔自然，但當各自都有另一半嘅時候，呢個感覺就唔會再係到亦唔會介懷。例如千嬅Ronald兩個都已經成婚仲有埋仔女，一切都變得穩定，都唔會再諗番咁多年前嘅事啦。

期待更好
就算分別後未有新歡，但時間慢慢過得一排就自然會適應，亦都唔會成日諗起舊事，最重要嘅係唔好鑽牛角尖，期待更好嘅將會出現，自己心理上都得到釋放。