葡萄友：收花不如套現 港女情人節翌日即賣男友送玫瑰花

情人節終於都過咗！對於男士而言真係可以話係雨過天晴，無他嘅，今時今日嘅情人節真係可以用「軍備競賽」嚟形用，女士都務求喺呢場競賽中突圍而出，而男士就乖乖奉上無盡驚喜啦。其中一環當然唔少得係送花啦！大大小小嘅鮮花滿佈公司、街上，手執鮮花嘅女士個個笑到甜入心，一邊推卻話「仲咩嘥埋呢啲錢呀～」一邊四萬咁口，耀武揚威走喺街頭及公司之中。不過所謂打完齋唔要和尚，軍備競賽過後，所有武器都淪為無必要嘅垃圾；鮮花亦唔例外！有好多女士都珍而重之放喺屋企，不過同樣地有部份女士覺得阻碇，會直接棄於堆填區，更精打細算者，甚至網上放售！好似近日情人節第二日已經有女生將一支「真空玫瑰」放上網出售，而且寫明「千幾蚊真空玫瑰，平放$300」仲有埋自己收花時個冧冧樣呢！其實有人話唔浪費，無用嘅就不如讓畀有心人，之不過諗深一層，鮮花係代表送贈者嘅心意，但竟然影張相，轉個頭就賣走？對送嘅人嚟講，好唔尊重，同時亦有被欺騙感情嘅感覺呢。網上仲有咩個案？睇睇啦。

結完婚即轉售鮮花
除咗情人節之外，結婚都一樣會收到老公仔嘅鮮花，同樣地都有女士好等錢使，翌日即刻轉售，仲寫明「先生婚禮送我的99枝玫瑰，$800」。你老公如果睇到，可能會覺得後悔娶咗你呀。

探病收花轉頭賣
愛人送嘅鮮花已經算小事，更甚者有人甚至將朋友探病送嘅鮮花都放上網賣！其實姑勿論心意唔心意，但鮮花放喺病房一段長時間，其實衛生問題已經係好令人質疑啦，會唔會太過份呢？

公司拎花再轉售
有唔少辦公室都鍾意放下植物，鮮花都係其中一樣常見物品，有人就試過將公司嘅鮮花偷偷收起再網上求售，仲寫明「公司風水花」；嘩，咁樣無本生利？嚴格嚟講係偷公司財物，拉得架，咪以身試法啦。