蔡卓妍婚事免提 收禮無「戒」限

東方日報
·2 分鐘文章
蔡卓妍笑言叫男友送戒指給她。
蔡卓妍笑言叫男友送戒指給她。

蔡卓妍與男友感情穩定屢傳婚訊,昨日出席活動時避談男友送求婚戒指,更使出好姊妹鍾欣潼的金句化解:「個個都戴戒指,唔通個個都係結婚咩?」

藝人蔡卓妍(阿Sa)與倪晨曦、林愷鈴昨日出席珠寶活動,戴上270萬珠寶首飾的阿Sa坦言都有收藏珠寶,媽媽亦幫她買下不少,最貴有價值7位數字的鑽石。問到富貴男友石恆聰可有送珠寶給她?她即避談說:「OK啦!(有冇送戒指?)OK啦!(求婚?)個個都戴戒指,唔通個個都係結婚咩?」但不忘幫品牌賣口乖,笑言叫男友送手上的「心心相印」戒指給她。

現時拍攝電影《金手指》的她坦言很開心,並表示要配合70、80年代的電影背景:「啲景全部搭出嚟,我哋啲衫、髮型會唔同。(同梁朝偉合作成點?)我同佢、白只最多對手戲,佢好好,佢驚我哋驚,所以會同我哋一齊食飯傾偈。(會唔會向佢請教?)佢唔係嗰種前輩會教你點做,佢係鍾意Teamwork。」面圓圓的她又大呻年紀大新陳代謝慢,故要多做運動及節食,問到男友可有投訴?她笑說:「冇喎!好彩我出道都係咁樣,大家都接受咗。(佢鍾意你肥定瘦? )身邊好多朋友都話我瘦,係我覺得自己肥。」

林愷鈴讚細佬靚仔

林愷鈴日前21歲生日,開心收到家人及朋友送的花,講到合照令細佬的樣貌曝光,她笑說:「其實係意外,嗰晚都冇乜點同佢影相,得嗰張矇嘅,但唔擺佢又好似有啲內疚。(佢被讚靚仔似Oppa?)其實由細到大我都覺得佢好靚仔。」問到可會叫對方入行?她坦言:「睇佢自己意願,佢依家先18歲。(佢鍾唔鍾意表演?)細個我哋有一齊上啲興趣班,不過佢鍾意運動多啲,佢性格比較內向,最緊要睇佢對藝術有冇熱情,膽可以練嘅。」

林愷鈴提到日前慶祝生日,大表開心。
林愷鈴提到日前慶祝生日,大表開心。